ఈ ఏడాది పత్తితీతలు, మిరప కోతలు ఒకేసారి రావడంతో జనవరి నుంచి కూలీల సమస్య తీవ్రంగా ఉంది. కర్నూలు, తెలంగాణ ప్రాంతం నుంచి వచ్చే కూలీలతో కొంతమేర కోతలు సాగించారు. ఒక్కొక్కరికి రోజుకు రూ.450 వరకు చెల్లించారు. ఇలాంటి సమయంలో కరోనా పిడుగు పడింది. దీంతో కోతలు సాగడం లేదు. ఖాళీ గోతాల ధర రూ.50 నుంచి రూ.100కు చేరింది. అవీ కావలసినన్ని దొరకడం లేదు. కోసి ఆరబెట్టిన మిర్చిని శీతల గోదాముకు తీసుకెళ్తే అక్కడా దిగుమతికి సరిపడా కూలీలు లేరు. గోదాము అద్దెలు బస్తాకు రూ.30 నుంచి రూ.70 వరకు పెరిగాయి.
- ఈ ఏడాది రాష్ట్రంలో 3.15 లక్షల ఎకరాల్లో మిరప సాగు చేశారు.
- ఎకరాకు రూ.1.50లక్షలపైగా రైతులు పెట్టుబడి పెట్టారు.
- గుంటూరు, ప్రకాశం, కృష్ణా, కర్నూలులో అధిక విస్తీర్ణంలో సాగైంది.
- లాక్‌డౌన్‌ నేపథ్యంలో మార్చి 22 నుంచి పది రోజుల పాటు పొలాలకు వెళ్లనీయలేదు. ఇప్పుడూ 1 గంట వరకే అనుమతిస్తున్నారు.
రశీదుపై రుణమిప్పిస్తే మేలు
కోత, రవాణాకే క్వింటాలుకు రూ.5వేల వరకు ఖర్చవుతోంది. కూలీ చెల్లించాలంటే వారి చేతిలో పైసా లేదు. అమ్ముదామంటే మిర్చి యార్డు మూసేశారు. శీతల గోదాముల రశీదులపై రుణమిప్పించేలా ప్రభుత్వం చర్యలు తీసుకోవాలని రైతులు కోరుతున్నారు.
ఇదీ చదవండి: కరోనా కాలం.. వేర్వేరు ప్రాంతాల్లో వధూవరులు
