ప్రజా వ్యతిరేక ప్రభుత్వ నిర్ణయాలను రద్దు చేసే అధికారం న్యాయస్థానాలకు ఉందని రాజ్యసభ సభ్యుడు కనకమేడల రవీంద్ర కుమార్ స్పష్టం చేశారు. 'ప్రమాదంలో ప్రజాస్వామ్యం' అంశంపై ఆంధ్రప్రదేశ్ పరిరక్షణ సమితి ఆధ్వర్యంలో గుంటూరులోని తెదేపా కార్యాలయంలో జరిగిన చర్చా వేదికలో కనకమేడల సహా తెదేపా సీనియర్ నేత ఆలపాటి రాజా, ప్రొఫెసర్ శ్రీనివాస్, సీపీఐ సహాయ కార్యదర్శి ముప్పాళ్ల నాగేశ్వరరావు, పలువురు ప్రజా సంఘాల నేతలు పాల్గొన్నారు. రాష్ట్రంలో జరుగుతున్న పరిణామాలపై వారు ఆందోళన వ్యక్తం చేశారు.
వైకాపా నేతలు 151 సీట్లు వచ్చాయని ఇష్టం వచ్చినట్లు మాట్లాడటం సరికాదు. రాష్ట్ర విభజన చట్టం ప్రకారం చూస్తే రాజధాని మార్చే అధికారం రాష్ట్ర ప్రభుత్వానికి లేదు. అలాగే అమరావతి నుంచి రాజధాని మార్చే ఏ ప్రక్రియ కూడా న్యాయ సమీక్ష ముందు నిలబడదు. కొవిడ్ను అడ్డు పెట్టుకుని ప్రతిపక్షాల హక్కులను ప్రభుత్వం కాలరాస్తోంది. హక్కుల అణచివేతలో ఏపీ దేశంలోనే మొదటి స్థానంలో ఉంది. ఇలా న్యాయస్థానం తీర్పులను, కేంద్ర ప్రభుత్వ ఆదేశాలను పట్టించుకోకుండా పాలన చేస్తున్న తరుణంలో రాష్ట్రపతి పాలన వచ్చేందుకు అవకాశం ఉంది- కనకమేడల రవీంద్ర కుమార్, తెదేపా ఎంపీ
మీడియా స్వేచ్ఛను హరించేలా వైకాపా సర్కారు జీవో తెచ్చింది. ప్రభుత్వానికి వ్యతిరేకంగా ఏ వార్త వచ్చినా ఆ మీడియాపై చర్యలు తీసుకుంటున్నారు. కోర్టు తీర్పులను కూడా గౌరవించే పరిస్థితి లేదు. జగన్మోహన్ రెడ్డి 16 నెలలు జైల్లో ఉన్నారు కాబట్టి.. అందరినీ జైల్లో ఉంచాలని కోరుకుంటున్నారు- ఆలపాటి రాజా, మాజీ మంత్రి
జగన్మోహన్ రెడ్డి అధికారంలోకి వచ్చాక రాష్ట్రంలో రాజ్యంగం, ప్రజాస్వామ్యం అనే పదాలు కనిపించటం లేదు. ఆధునిక యుగంలో ప్రజాస్వామ్య దేశంలో రాజ్యాంగం ప్రకారం ఎవరి పని వారు చేయాలి. అలా కాకుండా అన్నింటినీ ముఖ్యమంత్రి నిర్దేశిస్తారా?- ప్రొఫెసర్ శ్రీనివాస్, ఆంధ్రప్రదేశ్ పరిరక్షణ సమితి అధ్యక్షుడు
రాష్ట్రంలో ప్రజాస్వామ్యం సిగ్గుతో తలదించుకునే పరిస్థితిని జగన్ ప్రభుత్వం తీసుకొచ్చింది. ప్రజా వేదిక కూల్చటంతో మొదలైన అరాచకం ఇతర వ్యవస్థలను అగౌరవపర్చే స్థాయికి వెళ్లింది. 175 సీట్లకు 151 సీట్లు గెలిస్తే ఏమైనా చేయొచ్చా?. శాసన సభాపతి కూడా ఉన్మాదిలా వ్యవహరిస్తున్నారు. 30 ఏళ్లు ముఖ్యమంత్రిగా ఉండాలని భావిస్తున్న జగన్.. కనీసం మూడేళ్లయినా సరిగా పరిపాలన చేయాలి- ముప్పాళ్ల నాగేశ్వరరావు, సీపీఐ సహాయ కార్యదర్శి
ఇదీ చదవండి
