Babu Surety Future Guarantee Program: 45 రోజులు.. 3 కోట్ల మంది ఓటర్లు లక్ష్యం.. టీడీపీ కొత్త కార్యక్రమం

Babu Surety Future Guarantee Program: తెలుగుదేశం పార్టీ తొలి విడత మేనిఫెస్టోలో భాగంగా ప్రకటించిన ఆరు కార్యక్రమాల్ని విస్తృతంగా ప్రజల్లోకి తీసుకెళ్లేందుకు.. వైసీపీ ప్రభుత్వ ప్రజా వ్యతిరేక విధానాల్ని ఎండగట్టేందుకు సెప్టెంబరు 1 నుంచి 45 రోజులపాటు ‘బాబు ష్యూరిటీ - భవిష్యత్తుకి గ్యారెంటీ పేరుతో సరికొత్త కార్యక్రమానికి శ్రీకారం చుట్టింది. పార్టీ కేంద్ర కార్యాలయం ఎన్టీఆర్ భవన్‌లో దీనికి సంబంధించి పోస్టర్‌ను విడుదల చేసిన చంద్రబాబు.. కార్యక్రమ లక్ష్యాన్ని వివరించారు. నాయకులు, కార్యకర్తలంతా ఇందులో పాల్గొనాల్సిందేనని.. ఎవరికీ మినహాయింపు లేదని తేల్చి చెప్పారు.

Babu Surety Future Guarantee Program: వచ్చే 6 నెలలు పార్టీ ఏదైనా కార్యక్రమం చెప్తే చేయాల్సిందేనని.. ఇందుకు ఎవరూ అతీతులు కాదని తెలుగుదేశం అధినేత చంద్రబాబు తేల్చి చెప్పారు. పార్టీకి అనుకూల పవనాలు మొదలయ్యాక.. అప్పుడొచ్చి ఆ వేవ్‌లో గెలుస్తామంటే కుదరదని.. అందరూ కలిసే ఆ వేవ్‌ను సృష్టించాలని స్పష్టం చేశారు. బాబు ష్యూరిటీ - భవిష్యత్తుకి గ్యారెంటీ కార్యక్రమంలో భాగంగా ఇంటింటికీ వెళ్లి.. పార్టీ అధికారంలోకి వస్తే ఏం చేయనుందో నేతలు ప్రజలకు వివరించనున్నారు.

ప్రజా చైతన్యం తీసుకురావడంతో పాటు, వారికి నమ్మకం కలిగించేలా ఈ కార్యక్రమం నిర్వహించనున్నారు. రాష్ట్రంలో సంక్షేమ పథకాలు పుట్టిందే తెలుగుదేశంతో అనే విషయాన్ని గుర్తు చేస్తామన్న చంద్రబాబు.. ఇప్పుడు జగన్‌ ఇస్తున్నదానికి 3 రెట్లు ఎక్కువ సంక్షేమాన్ని ఇస్తామనే విషయాన్ని ప్రజలకు వివరిస్తామన్నారు. రాష్ట్రం కోసం, ప్రజల కోసం ఎంతో చేయాలని శ్రేణులకు చంద్రబాబు దిశానిర్దేశం చేశారు. ఇప్పటికే కార్యకర్తలు ఎన్నో కష్టాలు పడ్డారని ఆవేదన వ్యక్తం చేసిన చంద్రబాబు.. వారిని ఇబ్బందిపెట్టిన వారిని విడిచిపెట్టేది లేదన్నారు. అధికారంలోకి రాగానే రాజకీయ రౌడీలను తుదముట్టిస్తానని హెచ్చరించారు.

45 రోజుల్లో 3 కోట్ల మంది ఓటర్లను కలవడమే లక్ష్యంగా సెప్టెంబరు 1 నుంచి ‘బాబు ష్యూరిటీ- భవిష్యత్తుకి గ్యారెంటీ’ కార్యక్రమాన్ని చేపట్టనుంది. 75 శాతం ఓటర్లును ఇందులో కవర్‌ చేయాలని, ఎన్నికల్లోగా నూరు శాతం ఓటర్లను వ్యక్తిగతంగా కలవాలన్నది లక్ష్యం. ఈ కార్యక్రమంలో భాగంగా పార్టీ బూత్‌స్థాయి కార్యకర్తల నుంచి చంద్రబాబు వరకు రాష్ట్రంలో విస్తృతంగా పర్యటిస్తారు. చంద్రబాబు 30 నియోజకవర్గాలకు వెళ్తారు.

ఈ నాలుగున్నరేళ్లలో వివిధ కార్యక్రమాల్లో భాగంగా చంద్రబాబు ఇప్పటికే 145 నియోజకవర్గాలకు వెళ్లారని.. మిగిలిన 30 నియోజకవర్గాలను ఇప్పుడు కవర్‌ చేస్తారని పార్టీ నాయకులు తెలిపారు. కార్యక్రమంలో యూనిట్, క్లస్టర్‌ ఇన్‌ఛార్జులు ఒక్కో బూత్‌లో రోజుకి 10 ఇళ్లకు వెళ్లేలా ప్రణాళిక రూపొందించారు. ప్రతి నియోజకవర్గంలో కనీసం 2 లక్షల మంది ఓటర్లను కలవాలన్నది లక్ష్యం.

ఇంటింటికీ వెళ్లి టీడీపీ మేనిఫెస్టోలోని అంశాలను వివరించడంతో పాటు.. ఓటర్ల వివరాలు ఆన్‌లైన్‌లో నమోదు చేస్తారు. ఆయా కుటుంబాల్లోని సభ్యులు.. టీడీపీ ప్రకటించిన 6 సంక్షేమ కార్యక్రమాల్లో దేనికి అర్హులో.. అవి అమలైతే వారికి ఎంత లబ్ధి చేకూరుతుందో వివరిస్తారు. ఆ వివరాలు తెలియజేసే ఒక పత్రాన్ని కూడా అందజేస్తారు. ‘బాబు ష్యూరిటీ- భవిష్యత్తుకి గ్యారెంటీ కార్యక్రమంలో భాగంగానే ‘ప్రజా వేదిక’ పేరుతో.. ప్రతి 5 వేల మంది ప్రజలకు ఒకటి చొప్పున నియోజకవర్గ ఇన్‌ఛార్జులు సమావేశాలు నిర్వహిస్తారు. సామాజిక వరాల వారీగానూ సమావేశాలు జరుగుతాయి.