Intermediate Free Books Distribution: ఉచిత పుస్తకాల పంపిణీ బటన్ నొక్కు జగన్​ మామయ్య..!

Intermediate Free Books Distribution: డూబు డాబు ఎక్కువ.. డొక్కులో ఉప్పు తక్కువ అన్న చందంగా వైసీపీ ప్రభుత్వ తీరు తయారైంది. గతంలో ఇంటర్‌ విద్యార్థులకు మధ్యాహ్న భోజన పథకాన్ని రద్దు చేసిన ప్రభుత్వం ఇప్పుడు ఉచిత పుస్తకాల సరఫరానూ కూడా ఎత్తేసింది. విద్యారంగంలో వేల కోట్ల రూపాయలు ఖర్చు బెడుతున్నామని గొప్పలు చెప్పే జగన్‌.. పేద విద్యార్థుల కోసం పది కోట్లు విదల్చడానికి మాత్రం నిధులు లేవంటూ చేతులు దులుపుకుంటున్నారు. అంతేకాకుండా పిల్లలు, ప్రైవేటు కళాశాలలు.. ఫీజుల రూపంలో చెల్లించిన డబ్బుల్ని.. సొంత ప్రచారానికి వాడేసుకుంటున్నారు.

Intermediate Free Books Distribution: గ్లోబల్‌ విద్యార్థులుగా తీర్చిదిద్దడమే ప్రభుత్వ లక్ష్యమని చెప్పే సీఎం జగన్‌.. ప్రభుత్వ జూనియర్‌ కళాశాలల్లో చదివే విద్యార్థులకు.. ఉచిత పాఠ్యపుస్తకాల సరఫరాను నిలిపివేశారు. గతంలో ఇంటర్‌ విద్యార్థులకు మధ్యాహ్న భోజన పథకాన్ని ఎత్తేసిన సీఎం జగన్‌.. ఇప్పుడు ఉచిత పుస్తకాలను రద్దు చేశారు. సంస్కరణలకు.. వేల కోట్లు ఖర్చు చేస్తున్నామని బాకా ఊదుతున్న వైసీపీ సర్కారుకు.. 10కోట్ల రూపాయలతో పేద పిల్లలకు ఉచిత పుస్తకాలు ఇచ్చేందుకు మాత్రం చేతులు రావడం లేదు. మూడేళ్లుగా.. ప్రభుత్వ జూనియర్‌ కళాశాలల్లో చదివే పేద విద్యార్థులకు ఉచిత పుస్తకాల సరఫరాను ప్రభుత్వం రద్దు చేసింది.

ఇంటర్‌ విద్యామండలి వద్ద నిధులున్నా.. వాటిని ఖర్చు చేసుకునేందుకు అనుమతి ఇవ్వడం లేదు. పైగా మండలి నిధులను ఇతర కార్యక్రమాలకు మళ్లించి సీఎం జగన్‌ తన ఘనతగా ప్రచారం చేసుకుంటున్నారు. పిల్లలు, ప్రైవేటు కళాశాలలు చెల్లించే ఫీజుల డబ్బులను తన సొంత ప్రచారానికి వాడేసుకుంటున్నారు. ప్రభుత్వ కళాశాలల్లో చదివే వారిలో ఎక్కువగా పేదవారు, ఎస్సీ, ఎస్టీ, మైనారిటీ, బీసీ వర్గాల వారే ఉంటారు. ఇలాంటి వారికి పుస్తకాలు ఇచ్చేందుకు నిధుల్లేవంటున్న ప్రభుత్వాన్ని ఏమనాలి? ప్రతి సమావేశంలో నా ఎస్టీ, నా ఎస్సీ , నా బీసీ , నా మైనారిటీ అనే సీఎం జగన్‌కు.. వారికి పుస్తకాలు ఇవ్వాలని మాత్రం గుర్తుకు రావడం లేదా?

రాష్ట్రంలో 476 ప్రభుత్వ జూనియర్‌ కళాశాలలు ఉండగా..వీటిల్లో చదువుతున్న విద్యార్థులు లక్షా 21వేల 160మంది ఉన్నారు. వీరికి 44 రకాల టైటిళ్లను ఇచ్చేందుకు 10కోట్ల రూపాయలలోపే వ్యయం అవుతుంది. ప్రభుత్వం ఉచిత పుస్తకాలు ఇవ్వకపోవడంతో.... పేద విద్యార్థులపై భారం పడుతోంది. మొదటి ఏడాది MPC విద్యార్థులు 1,050రూపాయలు.., రెండో ఏడాది వారికి 11 వందల 70 రూపాయలు... పుస్తకాల వ్యయమవుతోంది. దాదాపుగా అన్ని గ్రూపుల వారు ఇంచుమించుగా ఇదే వ్యయం భరించాల్సి వస్తోంది. గత విద్యా సంవత్సరం 2022-23కు సంబంధించి ఉచిత పుస్తకాల నిధుల కోసం ఇంటర్‌ విద్యాశాఖ ప్రభుత్వానికి ప్రతిపాదనలు పంపగా.. ఆర్థిక శాఖ మూలకు పడేసింది. 2008-09 నుంచి 2012-2013 వరకు తిరుమల తిరుపతి దేవస్థానం పుస్తక ప్రసాదం కింద పాఠ్యపుస్తకాలకు నిధులు ఇచ్చింది. 2014-2020 వరకు రాష్ట్ర ప్రభుత్వం, సమగ్ర శిక్ష అభియాన్, ఇంటర్‌ విద్యామండలి నిధులతో పుస్తకాలను అందించారు. సందర్భానుసారం అయా విభాగాల నిధులతో అందించారు. 2020-21లో కరోనా పేరుతో పుస్తకాలను ముద్రించలేదు. ఆ తర్వాత నుంచి ఉచిత పుస్తకాలను ఇవ్వడం మానేశారు.