అమలాపురంలో నిరుపేదల ఆకలి కేకలు

లాక్​డౌన్​ కారణంగా అన్నార్తుల ఇబ్బందులు అన్నీఇన్నీ కావు. ఎవరైనా దాతలు సాయం చేసేందుకు ముందుకువస్తే.. వారి వద్దకు గుంపులు గుంపులుగా చేరుకుంటున్న దయనీయ పరిస్థితులు నెలకొన్నాయి. ఆకలి భరించలేక.. దాతలు చేసే సాయం కోసం ఎంతోమంది ఎదురుచూస్తున్నారు. అమలాపురంలో ఓ దాత బిస్కెట్లు పంచిపెడితే..వాటి కోసం చిన్న పిల్లల మెుదలుకొని పెద్దల వరకు అంతా రహదారి మీదకు వచ్చారు. ఈ క్రమంలో తోపులాట జరిగింది. ఈ ఘటనతో జానెడు పొట్టను నింపుకునేందుకు ఎంతోమంది పడుతున్న తిప్పలు హృదయాన్ని కదలిస్తున్నాయి.

తూర్పుగోదావరి జిల్లా అమలాపురంలో లాక్​డౌన్ కారణంగా ఇబ్బందులు పడుతున్న ప్రజలకు ఓ దాత బిస్కెట్లు పంచిపెట్టారు. పట్టణంలో ఒక కాలనీకి చెందిన నిరుపేదలు ఆ బిస్కెట్ల కోసం ఒకరిని ఒకరు తోసుకున్నారు. తీరా అతి కొద్దిమందికే ఆ బిస్కెట్లు దక్కడంతో మిగిలిన వారంతా నిరాశతో వెనుదిరిగారు. లాక్​డౌన్ కారణంగా ఆహారం కోసం ఇలా ఎందరో నిరుపేదలు దయనీయ పరిస్థితుల మధ్య చేతులు చాస్తున్నపరిస్థితులు నెలకొన్నాయి.

ఇదీ చూడండి:యానాంలో పటిష్టంగా లాక్​డౌన్