ఎన్నాళ్లీ నిరీక్షణ..? బోటు ప్రమాద బాధితులు ఆవేదన

కచ్చులూరు బోటు ప్రమాదం జరిగి 9 రోజులవుతున్నా, తమ వారి జాడ దొరక్క కుటుంబ సభ్యులు అంతులేని ఆవేదనకు గురవుతున్నారు. ఇంకా 15 మంది జాడ తెలియాల్సి ఉంది. బోటు వెలికి తీసేందుకు ప్రయత్నిస్తే, మరో మారు ప్రమాదం జరిగే అవకాశం ఉండటంతోనే..అధికార్లు బోటును వెలికి తీసేందుకు అనుమతి ఇవ్వడంలేదనే వాదన వినిపిస్తోంది.

కచ్చులూరు బోటు ప్రమాదంలో గల్లంతైన వారి ఆచూకీ కోసం కుటుంబ సభ్యులు నిరీక్షణలు కొనసాగుతున్నాయి. ప్రమాదం జరిగి తొమ్మిది రోజులు గడుస్తున్నా, ఆచూకీ లేకుండా పోయిన వారి కోసం రాజమహేంద్రవరం ప్రభుత్వ ఆసుపత్రి వద్ద...మృతుల బంధువులు పడిగాపులు కాస్తున్నారు. గోదావరి తీరంలో వివిధ చోట్ల లభిస్తున్న మృతదేహాలు, గల్లంతైన వారివనే అనుమానంతో రాజమహేంద్రవరం ప్రభుత్వాసుపత్రికి తరలిస్తున్నారు. ఇప్పటి వరకూ 36 మృతదేహాలు లభ్యం కాగా, మరో 15 మంది జాడ తెలియాల్సి ఉంది. తాజాగా పట్టిసీమ వద్ద ఓ మహిళ మృతదేహం లభ్యం కాగా రాజమహేంద్రవరం ప్రభుత్వ ఆసుపత్రికి తరలించారు.

ప్రమాదంలో గల్లంతైన వారి కుటుంబ సభ్యులు మరోసారి రాజమహేద్రవరం సబ్ కలెక్టర్ మహేశ్ కుమార్ ను కలిశారు. తమ వారి జాడను త్వరగా తెలియజేయాలని విన్నపించారు. బోటు వెలికితీయాలని బాధితులు వేడుకున్నా, అధికార యంత్రాంగం తర్జనభర్జన పడుతుందే తప్పా..బోటును కనీసం కదిపేందుకైనా ప్రయత్నించడం లేదనే ఆరోపణలు వెల్లువెత్తుతున్నాయి. కొంత మంది మత్స్యకారాలు బోటును వెలికితీస్తామని చెప్పినా, మరో ప్రమాదం జరిగే అవకాశం ఉందనే అనుమానంతోనే అధికార్లు అనుమతి ఇవ్వడంలేదని భావిస్తున్నారు.

.

ఇదీ చదవండి: "తప్పంతా మా నాన్నదే అంటే ఎలా?... ఆయనది ప్రాణం కాదా?"