రాష్ట్ర ప్రభుత్వ సాయం... నిరుద్యోగ యువతకు వరం

కళాశాలల్లో నేర్చుకున్న సబ్జెక్టుకు ఇంటర్వ్యూలో అడిగే ప్రశ్నలకు ఏ మాత్రం సంబంధం ఉండదు. దీనివల్ల అనేక మంది ఇంజినీరింగ్ పట్టభద్రులు నిరుద్యోగులుగా మిగిలిపోతున్నారు. ఇలాంటి పరిస్థితులను దూరం చేసేలా రాష్ట్ర ప్రభుత్వం పక్కా ప్రణాళికలను రూపొందించింది. రాష్ట్ర నైపుణ్యాభివృద్ధి సంస్థ(ఏపీఎస్​ఎస్​డీసీ) ద్వారా రాష్ట్రంలోని యువతను నైపుణ్యం దిశగా అడుగులు వేయిస్తోంది.

బయట మార్కెట్ తీరుకు అనుగుణంగా ఆయా కంపెనీలు కోరుకుంటున్న అవసరాలను బట్టి.... ప్రత్యేకంగా వృత్తి నైపుణ్య కోర్సులను రూపొందించిన రాష్ట్ర నైపుణ్యాభివృద్ధి సంస్థ ఏపీలో నెలకొల్పిన 6 సీమెన్స్ సెంటర్ ఆఫ్ ఎక్స్ లెన్స్ కేంద్రాల ద్వారా వాటిని అందుబాటులోకి తీసుకువచ్చింది. తిరుపతిలో ఎస్వీ విశ్వవిద్యాలయం ఇంజినీరింగ్ కళాశాలలోని సీమెన్స్ సీఈసీలో ఇప్పటికే ఈ కోర్సులకు శిక్షణ ప్రారంభం కాగా యువత నుంచి మంచి స్పందన లభిస్తోంది. కోర్సుల కోసం బెంగుళూరు, చెన్నై, హైదరాబాద్ వంటి ప్రాంతాలకు వెళ్లి లక్షల రూపాయలు ఖర్చు చేసే కంటే ప్రభుత్వం స్కిల్ డెవలప్​మెంట్ కార్పొరేషన్ ద్వారా అందుబాటులోకి తీసుకువచ్చిన అవకాశాన్ని యువతీ యువకులు అందిపుచ్చుకుంటున్నారు. ఆరు నుంచి ఎనిమిది వారాల పాటు కొనసాగే ఈ కోర్సుల ద్వారా నైపుణ్యాలు పెంచుకుంటున్నారు యువత. సాంకేతికపరంగా, పారిశ్రామికపరంగా విద్యార్థులను ఇక్కడ తీర్చిదిద్దుతున్నారు. ఈఈఈకి సంబంధించి ఎలక్ట్రికల్ అండ్ ఎనర్జీస్ స్టడీస్, ట్రిపుల్ ఈ, ఈసీఈ విద్యార్థుల కోసం ఇండస్ట్రియల్ ఆటో మేషన్... మెకట్రానిక్స్ అండ్ ప్రొసెస్ ఇన్​స్ట్రుమెంటేషన్, మెకానికల్ విద్యార్థుల కోసం కంప్యూటర్ ఎయిడెడ్ డిజైన్, సీఎన్​సీ ప్రోగ్రామింగ్ అండ్ మ్యాచింగ్ తదితర అధునాతన కోర్సులను అందుబాటులోకి తీసుకువచ్చారు. ఇందుకోసం నామమాత్ర రుసుం కింద 3వేల నుంచి 5వేల రూపాయల వరకు తీసుకుంటున్నారు.

అలసిన యువతకు ఆసరా
ప్రతీ సంవత్సరం వేల సంఖ్యలో ఇంజినీరింగ్ పట్టభద్రులు తయారవుతున్నా బయటి మార్కెట్ అవసరాలకు తగిన నైపుణ్యాలు లేకపోవటమే నిరుద్యోగానికి కారణంగా భావించి ఈ కోర్సులను రూపొందించినట్లు అధికారులు చెబుతున్నారు. చదివిన చదువుకు తగిన ఉద్యోగాలు లేక ఆయా కంపెనీలు అడిగే అర్హతలు సాధించలేక ఇన్నాళ్లూ డీలాపడిన ఇంజినీరింగ్ యువత ఈ వృత్తి నైపుణ్య కోర్సుల ద్వారా విజయం సాధిస్తామని ధీమా వ్యక్తం చేస్తున్నారు.