విజయసాయి రెడ్డి కోసం రాజ్యాంగ విలువలను వైకాపా ప్రభుత్వం కాలరాస్తుందని తెదేపా సీనియర్ నేత, మాజీ మంత్రి యనమల రామకృష్ణుడు ఆగ్రహం వ్యక్తం చేశారు. ముఖ్యమంత్రి జగన్మోహన్ రెడ్డి ముఖ్య అనుచరుడు విజయసాయి రెడ్డికి దిల్లీలో పట్టం కట్టేందుకే... తప్పుడు జీవో ఇచ్చి ప్రత్యేక ప్రతినిధిగా నియమించారు. తీరా గుట్టు రట్టయ్యేసరికి నాలుక కరుచుకొని జీవో రద్దు చేశారని దుయ్యబట్టారు.
దొడ్డిదారిలో ప్రభుత్వ ఎత్తుగడలు
13 రోజులపాటు ఆఫీస్ ఆఫ్ ప్రాఫిట్ పదవిలో ఉన్న విజయసాయి రెడ్డిని... ఎంపీగా అనర్హుడిగా ప్రకటించాలని డిమాండ్ చేశారు. ఈ మేరకు రాజ్యాంగ పెద్దలకు తెలుగుదేశం పార్టీ ఫిర్యాదు చేయనుందని తెలిపారు. ఇది తెలిసి దొడ్డిదారిన మళ్ళీ విజయసాయి రెడ్డిని ప్రత్యేక ప్రతినిధిగా నియమించేందుకు ఇంకో ఎత్తుగడ వేశారన్నారు. ఆర్డినెన్సు ద్వారా విజయసాయి రెడ్డికి... దిల్లీ పదవి కట్టబెట్టే ప్రణాళిక వేశారన్నారు. దిల్లీలో తన కేసులపై లాబీయింగ్ కోసమే ఈ పదవి కట్టబెట్టే ప్రయత్నం చేస్తున్నారని యనమల ఆరోపించారు.
రాజ్యాంగ విరుద్ధంగా ఆర్డినెన్సు జారీ
ఒక వ్యక్తి కోసం ఆర్డినెన్సు జారీ చేసిన చరిత్ర ఎక్కడైనా ఉందా అని ప్రశ్నించారు. ఆర్టికల్ 213 ప్రకారం ఆర్డినెన్సు జారీ చేసే అధికారం గవర్నర్దేనని గుర్తుచేశారు. అత్యవసరమైతే, ప్రజాప్రయోజనాల కోసమే ఆర్డినెన్సు ఇవ్వాలన్నారు. సభ సెషన్లో లేనప్పుడు, ప్రోరోగ్ చేసినప్పుడే ఆర్డినెన్సు ఇస్తారన్నారు. వ్యక్తిగత ప్రయోజనాల కోసం ఆర్డినెన్సు ఇవ్వడం రాజ్యాంగ విరుద్ధమన్నారు. దీనిని గవర్నర్ నరసింహం గుర్తుంచుకోవాలన్నారు. అసెంబ్లీ సమావేశాలు 11 నుంచి, బడ్జెట్ 12 న అని ఇప్పటికే మీడియాలో చూశామని... ఓటాన్ అకౌంట్ బడ్జెట్ ఈ నెలాఖరుతో ముగుస్తుందన్నారు. పూర్తికాలపు బడ్జెట్ నెలాఖరులోపు ఆమోదించాల్సి ఉందన్నారు. ఈ పరిస్థితుల్లో ఆర్డనెన్స్‌ ఎలా తీసుకొస్తారని ప్రశ్నించారు.
ఇవి కూడా చదవండి:
ఆ ముగ్గురి కృషిని ప్రజలు గుర్తించారు: కేశినేని నాని
