Police Picketing: రెండు గ్రామాల మధ్య వివాదం.. భారీగా పోలీసుల మోహరింపు

Police Picketing in Bapatla District: బాపట్ల జిల్లాలోని రామాపురం - కఠారివారిపాలెం గ్రామాల మధ్య పోలీసులు పికిటింగ్‌ నిర్వహిస్తున్నారు. ఈ రెండు మత్య్సకార గ్రామల మధ్య కొన్నాళ్లుగా వివాదం నడుస్తోంది. వీరి మధ్య అపోహలు తొలగించి సయోధ్య కుదిర్చేందుకు గ్రామ పెద్దలు ప్రయత్నించగా.. ఉద్రిక్తత నెలకొంది. ఈ నెల 24న మరోసారి చర్చలు జరుపుతామని గ్రామ పెద్దలు చెప్పడంతో అప్పటివరకు పహారా కొనసాగుతుందని పోలీసులు తెలిపారు.

Police Picketing in Bapatla District: బాపట్ల జిల్లా వేటపాలెం మండలం రామాపురం గ్రామస్థుల మధ్య నెలకొన్న వివాదం చిలికి చిలికి గాలివానగా మారుతోంది. కొందరు తమ రాజకీయ లబ్ధి కోసం ఆజ్యం పోస్తున్నారనే విమర్శలు వస్తున్నాయి. రామాపురం - కఠారివారిపాలెం గ్రామాల మధ్య పోలీస్ పికిటింగ్ కొనసాగుతోంది. ఎటువంటి అవాంఛనీయ సంఘటనలు జరగకుండా బాపట్ల డీఎస్పీ వెంకటేశ్వర్లు, చీరాల రూరల్ సీఐ మల్లికార్జునరావు ఆధ్వర్యంలో ఈ రెండు గ్రామాల్లో పోలీసులు భారీ బందోబస్తు ఏర్పాటు చేశారు. ఈ రెండు మత్స్యకార గ్రామల మధ్య కొన్నాళ్లుగా వివాదం నడుస్తోంది.

మూడు నెలల క్రితం రామాపురానికి చెందిన ఒకరు చేతబడి చేస్తున్నారనే అనుమానంతో గ్రామస్థులు నిలదీశారు. దీంతో ఆ వర్గానికి చెందిన 85 కుటుంబాలు గ్రామం విడిచి కఠారివారిపాలెం సమీపంలో గుడారాలు వేసుకొని నివాసం ఉంటున్నారు. వీరి మధ్య ఉన్న అపోహలు తొలగించి అందర్ని ఒకటి చేసే నిమిత్తం తీరప్రాంత గ్రామాలకు చెందిన పెద్దలు ప్రయత్నం చేయగా.. ఈ క్రమంలో కొద్దిపాటి తోపులాట జరగడంతో ఉద్రిక్తత నెలకొంది. దీంతో స్పందించిన పోలీసులు అక్కడ పికెట్లు ఏర్పాటు చేసి, పరిస్థితిని అదుపులోకి తీసుకొచ్చారు. వీరిని కలిపేందుకు ఈ నెల 24వ తేదీన మరోసారి మత్స్యకార గ్రామ పెద్దలు సమావేశం కానున్నారు. అప్పటివరకు పహారా కొనసాగుతుందని పోలీసులు చెప్తున్నారు.

దీనిపై స్పందించిన సీఐ మల్లికార్జున రావు.. గతంలో రామాపురం, కఠారివారిపాలెం మధ్య చిన్న చిన్న సమస్యలు ఉండేవని.. గొడవలు జరిగాయని తెలిపారు. అపోహలు కారణంగానే వివాదాలు చోటుచేసుకున్నాయని అన్నారు. ఇరు గ్రామాల మధ్య ఎటువంటి గొడవలు జరగకుండా.. అవాంఛనీయ ఘటనలు చోటుచేసుకోకుండా.. ముందు జాగ్రత్త చర్యలలో భాగంగా పికెట్లు ఏర్పాటు చేశామని పేర్కొన్నారు.

"గత కొన్ని సంవత్సరాల నుంచి సముద్ర తీర ప్రాంతాలైన ఓడరేవు, కఠారివారిపాలెం, రామాపురం ఇలా కొన్ని గ్రామాల మధ్య చిన్న చిన్న సమస్యలు ఉండటం వలన.. ఇంతకు ముందు గొడవలు పెద్దవి అయ్యాయి. కేసులు కూడా అయ్యాయి. దాని గురించి చట్ట ప్రకారం చర్యలు కూడా తీసుకోవడం జరిగింది. ఈ మధ్య కాలంలో రామాపురంలో ఉన్న కొంత మందికి ఉన్న అపోహలు కారణంగా చిన్న చిన్న వివాదాలు జరిగాయి. దాని కారణంగా కఠారివారిపాలెం, రామాపురం మధ్య ఏమైనా గొడవలు జరుగుతాయి ఏమో అనే ఉద్దేశంతో.. ముందు జాగ్రత్తగా ఇక్కడ పికెట్లు ఏర్పాటు చేయడం జరిగింది. ఎటువంటి అవాంఛనీయ ఘటనలు జరగకుండా చర్యలు తీసుకుంటున్నాం. ప్రజలంతా ప్రశాంతంగా ఉండమని కోరుతున్నాం". - మల్లికార్జునరావు, చీరాల రూరల్ సీఐ

ఇవీ చదవండి: