రాష్ట్రవ్యాప్తంగా తెదేపా ఆందోళన

అర్హులైన పేదలకు వెంటనే ఇళ్ల పట్టాలు అందించాలని తెదేపా నేతలు రాష్ట్రవ్యాప్తంగా ఆందోళన చేపట్టారు. తెదేపా హయాంలో నిర్మించిన ఇళ్లను లబ్ధిదారులకు అప్పగించకుండా జగన్​ ప్రభుత్వం కక్ష సాధింపు చర్యలకు పాల్పడుతుందని వారు ఆరోపించారు.

అనంతపురం జిల్లాలో..
హిందూపురంలో తెదేపా నేతలు ఆందోళన చేపట్టారు. అర్హులైన నిరుపేదలకు వెంటనే ఇళ్ల పట్టాలు అందించాలని వారు డిమాండ్ చేశారు. మున్సిపల్ కార్యాలయం ఎదుట బైఠాయించిన నేతలు తెదేపా హయాంలో నిర్మించిన ఇళ్లను లబ్ధిదారులకు అప్పగించకుండా జగన్ ప్రభుత్వం కక్ష సాధింపు చర్యలకు పాల్పడుతుందని వారు ఆరోపించారు. లబ్ధిదారులకు ఇళ్లను అప్పగించాలని.. లేనిపక్షంలో రాష్ట్రవ్యాప్తంగా ఆందోళనలను ఉద్ధృతం చేస్తామని హెచ్చరించారు.

ప్రకాశం జిల్లాలో...
కనిగిరి పట్టణంలో తెదేపా నేతలు నిరసన చేపట్టారు. తెదేపా హయంలో నిర్మించిన ఇళ్లను లబ్దిదారులకు అందించాలని వారు డిమాండ్ చేశారు. ఈ మేరకు లబ్ధిదారులతో కలిసి తెదేపా నేతలు "నా ఇల్లు నా సొంతం నా ఇల్లు కావాలి" కార్యక్రమాన్ని నిర్వహించారు. నిరసన చేస్తున్న తెదేపా నేతలను పోలీసులు అడ్డుకున్నారు. దీనిపై ఆగ్రహం వ్యక్తం చేసిన లబ్ధిదారులు తమ ఇండ్లనైనా చూసుకోనివ్వడం లేదని ఆవేదన వ్యక్తం చేశారు.

తెలుగుదేశం ప్రభుత్వ హయాంలో నిర్మించిన జి ప్లస్ 2 ఇళ్లను వెంటనే లబ్దిదారులకు అప్పగించాలంటూ ఒంగోలులో తెదేపా ఆందోళన చేపట్టింది. నా ఇల్లు నా సొంతం పేరుతో కొప్పోలు, చింతల ప్రాంతాల్లో నిర్మించిన టిడ్కొ ఇళ్లను వైకాపా ప్రభుత్వం వృథాగా వదిలేస్తుందని, దాదాపు నిర్మాణాలు పూర్తైన ఇళ్లను లబ్దిదారులకు అప్పగించాలని, లేదంటే తామే స్వాధీన పరుచుకుంటామని వీరు హెచ్చరించారు. తక్షణం లాటరీ పద్ధతి ద్వారా ఇల్లు కేటయించాలని, పెండింగ్​లో ఉన్న ఇళ్లను కూడా పూర్తి చేయాలని డిమాండ్ చేశారు.

విజయనగరం జిల్లాలో...
బొబ్బిలిలో నిర్మించిన టిడ్కో ఇళ్లను పేదలకు కేటాయించాలని తేదేపా నాయకులు నిరసన చేపట్టారు.. నిర్మించిన గృహాలను వెంటనే లబ్ధిదారులకు అందించాలని వారు డిమాండ్ చేశారు.

తూర్పుగోదావరి జిల్లాలో...
రాష్ట్ర ప్రభుత్వం వెంటనే ఇళ్ల స్థలాలు పంపిణీ చేయాలని డిమాండ్ చేస్తూ తూర్పుగోదావరి జిల్లా ప్రత్తిపాడులో తెదేపా నియోజకవర్గ ఇంఛార్జ్ వరుపుల రాజా ఆధ్వర్యంలో తెదేపా కార్యకర్తలు ఆందోళన చేపట్టారు. ఈ సందర్భంగా వరుపుల రాజా మాట్లాడుతూ.. ప్రత్తిపాడు నియోజకవర్గంలో 70 గ్రామాల్లో ఇళ్ల స్థలాల పేరుతో భారీ స్థాయిలో కుంభకోణం జరిగిందని ఆరోపించారు.

అర్హత గల పేదలందరికీ ఇళ్ల స్థలాలు పంపిణీ చేయాలని డిమాండ్ చేస్తూ మామిడికుదురు మండలం కొమరాడలో తెదేపా నాయకులు ధర్నా చేశారు. పల్లపు ప్రాంతాలుగా ఉన్న భూములను మెరక చేసి పేదలకు పంపిణీ చేయాలని కోరారు. ఈ కార్యక్రమంలో స్థానిక తెలుగుదేశం నాయకులు పలువురు పాల్గొన్నారు.

చిత్తూరు జిల్లాలో...
పుత్తూరులో టిడ్కో ఇళ్ల వద్ద తెదేపా నేతలు నిరసన చేపట్టారు. తెదేపా హయాంలో నిర్మించిన ఇళ్లను వెంటనే లబ్ధిదారులకు అందించాలని వారు డిమాండ్ చేశారు. ఇళ్లను లబ్ధిదారులకు అందించనిపక్షంలో పెద్ద ఎత్తున నిరసనలు చేపడతామని వారు తెలిపారు.

కర్నూలు జిల్లాలో...
నంద్యాల ఎస్సార్బీసి కాలనీలో టిడ్కో నిర్మించిన ఇళ్లను వెంటనే లబ్ధిదారులకు కేటాయించాలని మాజీ ఎమ్మెల్యే భూమా బ్రహ్మానందరెడ్డి డిమాండ్ చేశారు. "నా ఇల్లు నా సొంతం.. నా ఇంటి స్థలం నాకు ఇవ్వాలి" అనే నినాదంతో తెదేపా కార్యకర్తలతో కలిసి ఇళ్లను సందర్శించారు. తెదేపా ప్రభుత్వ హయాంలో మాజీ ముఖ్యమంత్రి చంద్రబాబు నాయుడు ఆధ్వర్యంలో అన్ని మౌలిక వసతులతో నిర్మిస్తే ఇంతవరకు లబ్ధిదారులకు ఇవ్వకపోవడం అన్యాయమన్నారు. ప్రభుత్వం స్పందించి తక్షణమే ఇళ్లు ఇవ్వాలని తెలిపారు.

ఇదీ చదవండి