Officials About Irrigation Water to HLC: సాగు మధ్యలో నీటి నిలిపివేత.. పంటలు కాపాడుకునేందుకు రైతుల భగీరథ ప్రయత్నం

Officials about Irrigation Water to HLC: తీవ్ర వర్షాభావ పరిస్థితులు ఎదురైనప్పటికీ కాలువలకు నీరు వస్తుండటంతో రైతులు ఎంతో ఆశగా మిరప సాగు చేశారు. పంట ఆశాజనకంగా పెరుగుతున్న తరుణంలో నవంబరు 10 నుంచి హెచ్​ఎల్సీకి నీటిని నిలిపివేస్తున్నట్లు అధికార యంత్రాంగం ప్రకటించింది. దీంతో రైతులు తీవ్ర ఆందోళన చెందుతున్నారు.

Officials about Irrigation Water to HLC: అనంతపురం జిల్లా విడపనకల్లు మండలం పొలికి గ్రామ పరిసరాల్లో 4వేల ఎకరాల్లో మిరప పంటను సాగు చేశారు. ప్రస్తుతం పంట వృద్ధి దశలో ఉంది. పూర్తి స్థాయిలో పంట చేతికి రావాలంటే జనవరి వరకు సాగు నీరు అవసరం. ఇలాంటి పరిస్థితుల్లో నవంబరు 10 నుంచి హెచ్​ఎల్సీకి (High Level Canal) నీటిని నిలిపివేస్తున్నట్లు అధికారులు ప్రకటించడంతో రైతులు దిక్కుతోచని పరిస్థితుల్లో కొట్టుమిట్టాడుతున్నారు. ఒక్కో ఎకరాకు ఇప్పటికే లక్ష వరకు రైతులు పెట్టుబడి పెట్టారు. పంట సాగు చేసిన వారిలో అత్యధికంగా కౌలు రైతులే కావడంతో.. నీరు రాకపోతే తీవ్రంగా నష్టపోతామని వాపోతున్నారు.

అధికారులు ప్రకటించిన సమయానికి నీరు నిలిపివేస్తే.. రైతులు పడిన శ్రమ, పెట్టిన పెట్టుబడి బూడిదలో పోసిన పన్నీరే అవుతుంది. కళ్లెదుటే ఆశాజనకంగా పెరుగుతున్న పంటను వదిలేయలేక.. దానిని కాపాడుకునేందుకు రైతులు తంటాలు పడుతున్నారు. పొలాల్లోనే నీరు నిల్వ ఉండే విధంగా కుంటలు తవ్వి.. మోటర్ల సాయంతో నీటిని నింపుతున్నారు. ఈ ప్రక్రియను పూర్తి చేసేందుకు మరో లక్ష రూపాయిల ఆర్థిక భారాన్ని భరించాల్సి వస్తోందని రైతులు వాపోతున్నారు.

మరికొందరు రైతులు బోర్లను తవ్వించుకుంటున్నారు. విద్యుత్‌ మోటర్లు, ఇంజన్లు, ఇలా ఒక బోరు నుంచి నీరు బయటకు రావాలంటే సుమారు లక్షా యాభై వేల వరకు అదనపు పెట్టుబడి పెట్టాల్సివస్తోందని రైతులు చెబుతున్నారు. నవంబర్‌ 10 నుంచి నీటిని నిలిపివేస్తామన్న నిర్ణయాన్ని నీటి పారుదలశాఖ అధికారులు ఉపసంహరించుకోవాలని రైతులు కోరుతున్నారు. తక్షణమే కర్ణాటక ప్రభుత్వంతో చర్చలు జరిపి నీటి విడుదలను కొనసాగించాలని అన్నదాతలు వేడుకుంటున్నారు.

"ఇప్పటి వరకూ పెట్టుబడి 60 వేలు పెట్టాము. పంటను మధ్యలో వెడిచిపెట్టలేము కదా. మరో 60 వేల వరకూ అవుతాయి. దీంతో సొంతంగా డబ్బులు పెట్టి.. కుంటలు తీపిస్తున్నాం. మరో రెండు నెలలు ఉంటే పంట చేతికి వస్తుంది. లేకపోతే ఏం రావు. పెట్టింది మొత్తం నష్టపోవాల్సిన పరిస్థితి". - రైతు

"బోరు వేయించుకుంటే లక్షకు పైనే అవుతుంది. కరెంటు లేదు. డీజిల్​ అయితే చాలా ఖర్చు అవుతోంది. కాబట్టి ప్రభుత్వమే మరో రెండు నెలలు నీటిని విడుదల చేయాలని కోరుకుంటున్నాం. దీనిపై కర్ణాటక ప్రభుత్వంతో అయినా సరే మాట్లాడాలి అని విన్నవించుకుంటున్నాం". - రైతు

"నీళ్లు ఆపేస్తామని చెప్పడంతో ముందస్తుగా బోరు వేశాం. కానీ ఇది నాలుగు ఎకరాలకే వస్తుంది. మరో రెండు ఎకరాలకు నీరు రావడం లేదు. ఇప్పటికే బోరుకి లక్షకు పైగా అయింది. ప్రభుత్వం నీటిని విడుదల చేస్తే బాగుంటుంది అని కోరుకుంటున్నాం". - రైతు