కఠిన పరీక్ష..! పదో తరగతి విద్యార్థికి తెలుగుకు బదులు సంస్కృతం పేపర్

Sanskrit instead of Telugu In Tenth Exam: పదవ తరగతి పరీక్షలో ఓ విద్యార్థికి ఓ ప్రశ్నాపత్రానికి బదులు మరో ప్రశ్నాపత్రం అందింది. అక్కడ ఉన్న ప్రధానోపాధ్యాయుడు ఆరా తీయగా... నీకు ఈ ప్రశ్నాపత్రమే వచ్చిందనే సమాధానం ఇచ్చాడని విద్యార్ధి అన్నారు. తన కుమారుడి భవిష్యత్తు ఏమవుతోందని విద్యార్థి తండ్రి ఆందోళన చెందుతున్నాడు.

Sanskrit instead of Telugu In Tenth Exam : విద్యార్థి భవిష్యత్తుకు పునాది పదవ తరగతి. 10 వ తరగతి ఉత్తీర్ణత కావాలని విద్యార్థులు కష్టపడతారు. ఆ విద్యార్థి సంవత్సరం చదివిన చదువును పరీక్షల్లో అమలు చెద్దామని పరీక్ష కేంద్రానికి వెళ్లాడు. ఇన్విజిలేటర్ ఇచ్చిన ప్రశ్నాప్రత్రం చూసి ఒక్కసారిగా షాక్ అయ్యాడు. అతను షాక్ అయ్యింది తాను చదివిన ప్రశ్నలు రానందుకు కాదు తన సబ్జెక్ట్ పేపర్​కు బదులుగా వేరే సబ్జెక్ట్ పేపర్ ఇచ్చారు ఆ విద్యార్ధికి..

తెలుగు బదులు సంస్కృతం : తనకు తెలుగు ప్రశ్నాపత్రంకు బదులు సంస్కృతం భాషకు చెందిన ప్రశ్నాపత్రం రావడంతో ఆ విద్యార్థి అయోమయంలో పడ్డాడు. ఈ సంఘటన ఆలస్యంగా వెలుగులోకి వచ్చింది. విద్యార్థి అజిత్ కుమార్ అనంతపురం జిల్లా పరీక్షా కేంద్రంలో పదో తరగతి పరీక్షలు రాస్తున్నాడు. అజిత్ కుమార్ కుందుర్పి మండల కేంద్రంలోని ప్రాథమిక పాఠశాలలో పదవ తరగతి తెలుగు పరీక్షకు హాజరు అయ్యాడు. పరీక్ష రాయడానికి అక్కడికి వెళితే తనకు సంస్కృతి ప్రశ్నాపత్రం అందడంతో కంగుతిన్నాడు.

పరీక్ష గదిలోని ఇన్విజిలేటర్​ని అడుగగా ఆ విద్యార్థికి సంస్కృతి ప్రశ్నాపత్రమే తనకు వచ్చిందని ఆ ఇన్విజిలేటర్​ తెలిపాడు. ఈ విషయంపై సంబంధిత ప్రధానోపాధ్యాయులు అడిగి విచారించగా విద్యార్థి దరఖాస్తు చేసుకునే సమయంలో అలాగే రాసి పంపారని నిర్ధారించారు. విషయం బయటకు పొక్కకుండా విద్యార్థికి నచ్చజెప్పి, ఏ ప్రశ్నాపత్రం వచ్చినదో అదే ప్రశ్న పత్రానికి జవాబు రాయమని తెలిపి విద్యార్ధిని పంపేశారు.

ఈ విషయం బయటకు రాకుండా అన్ని జాగ్రత్తలు తీసుకున్నారు. కానీ విద్యార్థి ఏడ్చుకుంటూ బయటకు రావడం, తన తల్లిదండ్రులతో జరిగిన విషయం తెలపడంతో సంఘటన వెలుగులోకి వచ్చింది. తాను ఏ మాత్రం పరీక్ష రాయలేదని విద్యార్థి ఆవేదన వ్యక్తం చేశాడు. తన కుమారుడు చేయని తప్పుకు భవిష్యత్తు ఏమవుతుందోనని అజిత్ కుమార్ తండ్రి నాగరాజు ఆందోళన వ్యక్తం చేస్తున్నాడు. సంబంధిత విద్యార్థి ప్రధానోపాధ్యాయురాలు మాత్రం అందుబాటులోకి రావడం లేదు.

"పరీక్ష కేంద్రానికి వెళ్లినప్పుడు తెలుగుకు బదులు సంస్కృతం పేపర్ ఇచ్చారు. దానికి నేను సమాధానాలు రాయలేదు." - అజిత్ కుమార్, విద్యార్థి

"నా కొడుకు బాగా చదువుతున్నాడు. నా కొడుకు చదువుతున్నది తెలుగే. కానీ పరీక్షకు పోతే తెలుగు పేపర్ విడిచి పెట్టి వేరే పేపర్ ఇచ్చి రాపిచ్చినారు. నా కొడుకు ఏమీ రాయలేదు. చదివితేనే కదా రాసేది. ఫెయిల్ అవుతానని బాధ పడుతున్నాడు. ఎక్కడ తప్పు జరిగిందో నాకు తెలియదు. " - నాగరాజు, విద్యార్థి తండ్రి

ఇవీ చదవండి