Donkey running competitions: అనంతపురం జిల్లా వజ్రకరూర్లో వెలసిన శ్రీ జనార్ధన వెంకటేశ్వర స్వామి రథోత్సవం నిర్వహించారు. ఈ సందర్భంగా వినూత్నంగా గాడిదల పరుగు పోటీని నిర్వహించారు. గాడిదలపై వాటి యజమానులు కూర్చొని.. వాటిని పరిగెత్తిస్తూ లక్ష్యాన్ని చేరుకోవాలి. ఈ పోటీలో గుర్రాలకు తామేమీ తీసిపోమంటూ.. తగ్గేదేలే అన్నట్టుగా పరుగులు తీశాయి గాడిదలు. ఈ పరుగు పోటీలను తిలకించడానికి వివిధ ప్రాంతాల నుంచి జనం తండోపతండాలుగా తరలివచ్చారు.
ఈ పోటీలను క్రీడామైదానంలో కాకుండా.. రోడ్డు మీదనే నిర్వహించారు. వజ్రకరూరు నుంచి తొమ్మిది కిలోమీటర్ల దూరం వెళ్లి.. తిరిగి వజ్రకరూరుకు వచ్చే విధంగా మొత్తం 18 కిలోమీటర్ల దూరం ఈ గాడిదల రన్నింగ్ పోటీ నిర్వహించారు. ఈ రేసులో చివరకు మూడు గాడిదలు మాత్రమే మిగిలాయి. ఆద్యంతం ఆసక్తికరంగా, పోటాపోటీగా సాగిన ఈ గాడిదల పరుగు పందేన్ని.. యువకులు బైకులపై ప్రయాణిస్తూ తిలకించారు.
ప్రతీ సంవత్సరం ఈ పోటీలను నిర్వహిస్తున్నామని కరోనా కారణంగా గత రెండేళ్లు నిర్వహించలేక పోయామని నిర్వాహకులు తెలిపారు. పరుగు పందెంలో విజయం సాధించిన వారికి నగదు బహుమతి అందజేసి.. శాలువా కప్పి సత్కరించారు.
ఘనంగా రథోత్సవం: వజ్రకరూర్లో జనార్ధన వెంకటేశ్వర స్వామి రథోత్సవం గురువారం సాయంత్రం కన్నులపండువగా జరిగింది. రథోత్సవాన్నీ తిలకించడానికి చుట్టుపక్కల మండలాలు, ఇతర గ్రామాల నుంచి సైతం భక్తులు పెద్ద సంఖ్యలో హాజరై... మొక్కులు తీర్చుకున్నారు.. ఈ గ్రామంలో ఈ కార్యక్రమానికి అక్కడి పోలీస్ ఉన్నతాధికారులకు సన్మానం చేసి...పోలీస్ స్టేషన్ నుంచి భాజా భజంత్రీల మధ్య దేవాలయానికి పిల్చుకుని రావడం ఇక్కడి సంప్రదాయం. కార్యక్రమం అనంతరం రథం వద్ద భక్తులు ప్రత్యేక పూజలు నిర్వహించారు. అంతకుముందు తెల్లవారుజామున స్వామివారి మూల విరాట్కు అభిషేకం, అలంకరణ, అర్చనలు, పూజలు చేశారు. స్వామివారి ఉత్సవ విగ్రహాన్ని అలంకరించి క్షేత్రం ఆవరణంలో భాజాభజంత్రీల నడుమ ఊరేగించారు. సాయంత్రం రథంపై ఉత్సవ విగ్రహాన్ని కొలువుదీర్చి రథాన్ని లాగారు.
ఇదీ చదవండి: శునకం.. మేక పిల్లలకూ అమ్మయ్యిందిగా..!
