Guntakal RTC depot diesel tanker seized: అనంతపురం జిల్లా గుంతకల్లు ఆర్టీసీ డిపోకు ఇంధన సరఫరా చేస్తున్న డీజిల్ ట్యాంకర్‌ను రెవెన్యూ అధికారులు సీజ్ చేశారు. ఆర్టీసీ డిపోలోని బస్సులకు ఇంధనం నింపడం కోసం కాంట్రాక్ట్ పొందిన కాంట్రాక్టర్లు.. అధికారులు అనుమతించిన ప్రదేశం నుండి కాకుండా.. మరో ప్రాంతం నుండి ఇంధనాన్ని డిపోకు సరఫరా చేస్తుండగా అధికారులు గమనించి పట్టుకున్నారు. అయితే.. టెండర్ పొందిన వ్యక్తి మాత్రం తమకు అన్ని బిల్లులు సక్రమంగా ఉన్నాయని, అనుకూలమైన ప్రాంతం నుండే ఇంధనం సరఫరా చేయడానికి తమకు అన్నీ అనుమతులు ఉన్నాయంటూ అధికారులతో వాగ్వావాదానికి దిగారు.
మొదట్లో అనధికారిక ప్రాంతం నుండి ఇంధనం తీసుకొని.. ఆర్టీసీ డిపోకు తరలిస్తున్నట్లు సమాచారం అందుకున్న సివిల్ సప్లై అధికారులు.. ఆర్టీసీ డిపోలో తనిఖీలకు వెళ్లి ఆర్టీసీ సిబ్బందికి, రెవెన్యూ అధికారుల విధులకు ఆటంకం కలిగించి తీవ్ర ఇబ్బందులకు గురి చేశారు. పర్మిషన్ లేకుండా ఆర్టీసీ డిపోలోకి ఎలా ప్రవేశిస్తారు? అంటూ హంగామా సృష్టించారు. గుంతకల్లు ఆర్టీసీ డిపోకు గార్లదిన్నెలో ఉన్న ఫిల్లింగ్ స్టేషన్ నుండి ఇంధనం సరఫరా చేయాల్సి ఉండగా.. సుదూర ప్రాంతంలోని మడకశిర నుండి డీజిల్ సరఫరా చేయడం పలు అనుమానాలకు తావిస్తోంది.
130 కిలోమీటర్ల దూరం నుండి ఇంధనాన్ని సరఫరా చేయాల్సి ఉండగా.. దాదాపు 450 కిలోమీటర్ల దూరం నుండి డీజిల్ తీసుకొని డిపోలో అన్లోడ్ చేయడం ఈ అనుమానాలకు బలాన్నిస్తోంది. అంతేకాకుండా, కర్ణాటక ప్రాంతంలో డీజిల్ ధరలు తక్కువగా ఉండడంతో అక్కడి నుండి తీసుకొని వచ్చి.. నకిలీ బిల్లుల ద్వారా డిపోకు సరఫరా చేస్తున్నారేమోనన్న అనుమానాలు వ్యక్తమవుతున్నాయి.
ఒక దశలో మూడు గంటల పాటు రెవెన్యూ అధికారులకు, డిపో అధికారులకు, కాంట్రాక్టర్‌కు మధ్య వివాదం కొనసాగింది. వాహనాన్ని సీజ్ చేస్తున్నట్లు అధికారులు ప్రకటించగా.. తమ వద్ద బిల్లులు అన్ని సక్రమంగా ఉన్నాయని, తమ వాహనం ఎలా సీజ్ చేస్తారని అందరి అధికారులపై.. జిల్లా కలెక్టర్‌కు ఫిర్యాదు చేస్తామంటూ కాంట్రాక్టర్లు రెచ్చిపోయారు. అయితే, కాంట్రాక్టర్లు, అధికారులు మామూళ్ల కోసం.. రాజకీయ నాయకులు వారి వర్గం వారికి కాంట్రాక్ట్ అప్పగించడం కోసం.. తమపై మాటిమాటికి పై అధికారులతో దాడులు చేయిస్తూ.. ఇలా ఒత్తిడి చేస్తున్నారని డిపో అధికారులు ఆరోపించారు.
ఇవీ చదవండి
