హేమంత్ హత్య కేసు విచారణలో పోలీసులు వేగం పెంచారు. ప్రధాన నిందితులు అవంతి తండ్రి లక్ష్మారెడ్డి, మేనమామ యుగంధర్ రెడ్డిని ఆరు రోజుల కస్టడీకి కోర్టు అనుమతి ఇచ్చింది. నిందితులను ఉదయం జైలు నుంచి గచ్చిబౌలి పోలీస్ స్టేషన్కు తీసుకొచ్చి విచారణ చేశారు. హత్య జరిగిన రోజు పరిణామాలపై ప్రధానంగా విచారిస్తున్నట్లు తెలిసింది.
గతంలో అవంతి, హేమంత్ మధ్య ప్రేమ విషయంలో అవంతిని ఆమె కుటుంబ సభ్యులు ఇబ్బంది పెట్టిన వ్యవహారంపై విచారణ చేశారు. తమకు ప్రాణహాని ఉందని అవంతి, ఆమె అత్త, మామ నిన్న డీసీపీని కలిసి వినతి పత్రం ఇచ్చారు. ఈ రోజు సీపీని కలిసి తమకు రక్షణ కల్పించాలంటూ వినతి పత్రం అందించారు. ఫాస్ట్ కోర్టు ద్వారా విచారణ జరిపి నిందితులకు త్వరగా శిక్ష పడేలా చూడాలన్నారు. సానుకూలంగా స్పందించిన సీపీ సజ్జనార్... హేమంత్ ఇంటి వద్ద భద్రత ఏర్పాటు చేశారు.
ఈ కేసులో ఫాస్ట్ ట్రాక్ కోర్టు ఏర్పాటు చేయాలని సీపీ సజ్జనార్ ఇప్పటికే ప్రభుత్వాన్ని కోరారు. త్వరలో ఫాస్ట్ ట్రాక్ కోర్టు ఏర్పాటు అయ్యే అవకాశం ఉంది. ఆ లోపు చార్జీషీట్ తయారు చేయాలని పోలీసులు భావిస్తున్నారు. ఈ కేసులో ఎవరిని వదిలిపెట్టేది లేదని సీపీ అన్నారు.
