ఆన్లైన్ పేకాట వ్యసనం కారణంగా ఓ వ్యక్తి ఉద్యోగం పోయింది. అంతేకాదు మరో ప్రైవేటు కంపెనీలో చేరిన అతను 50 లక్షలు తీసుకుని ఉడాయించాడు. చివరకు బుక్కయ్యాడు. ఆంధ్రప్రదేశ్లోని శ్రీకాకుళంకు చెందిన నవీన్ బెంగళూర్లో బ్యాంకింగ్ సేవల్లో డిప్లొమా పూర్తి చేసి హైదరాబాద్లోని ఓ ప్రైవేట్ బ్యాంకులో అసిస్టెంట్ మేనేజర్గా చేరాడు. ఈ క్రమంలో ఆన్లైన్లో పేకాటకు బానిసై అప్పుల పాలయ్యాడు. చివరికి ఉన్న ఉద్యోగం పోగొట్టుకున్నాడు. 2020 జూన్లో పెద్ద అంబర్పేట్లో ఉన్న జేబీ ఇన్ ఫ్రా స్థిరాస్తి సంస్థలో అసిస్టెంట్ మార్కెటింగ్ మేనేజర్గా చేరాడు.
ఈ నేపథ్యంలో కంపెనీ మేనేజర్ ఓ రోజు నవీన్కు 50 లక్షల రూపాయలు ఇచ్చి మరుసటి రోజు బ్యాంకులో జమ చేయాలని సూచించాడు. 50 లక్షలు తన గదికి వెంట తీసుకెళ్లిన నవీన్కు దురాలోచన పుట్టింది. తన వద్ద ఉన్న డబ్బుతో ఆన్లైన్ పేకాట ఆడి ఒకే రోజు 12 లక్షలకుపైగా నష్టపోయాడు. మరుసటి రోజు కంపెనీ మేనేజర్ నుంచి ఫోన్ వచ్చినా... స్పందించలేదు. వెంటనే తన వద్ద ఉన్న మిగిలిన డబ్బులను తీసుకుని పలాసకు వెళ్లాడు. అక్కడ తన మామ రామకృష్ణకు ఐదు లక్షలు ఇచ్చాడు. మిగిలిన డబ్బులను తీసుకుని ఇంకో బంధువు అమిత్ రెడ్డితో కలిసి కలకత్తా వెళ్లి జల్సా చేయసాగాడు. జేబీ ఇన్ ఫ్రా సంస్థ మేనేజర్ ఫిర్యాదు మేరకు కేసు నమోదు చేసుకుని దర్యాప్తు చేపట్టిన పోలీసులు.. ముగ్గురు నిందితులను అరెస్ట్ చేసి రిమాండ్కు తరలించారు. నిందితుల నుంచి రూ.28.7 లక్షల నగదు, మూడు చరవాణిలు స్వాధీనం చేసుకున్నారు.
ఇదీ చూడండి :
