3.60లక్షల మంది ఓటుహక్కు కోల్పోయారు: పట్టాభి
స్థానిక సంస్థల ఎన్నికలకు సంబంధించి సమగ్ర ఓటర్ల జాబితా తయారు చేయకపోవటంతో 3.60 లక్షల మంది ఓటుహక్కు కోల్పోయారని తెదేపా అధికార ప్రతినిధి కొమ్మారెడ్డి పట్టాభిరామ్ మండిపడ్డారు. 'సవరించిన ఓటర్ల జాబితాను, ప్రభుత్వం కోర్టుకి, ఎస్ఈసీకి సమర్పించకపోవడం పెద్ద నేరం. దీనికి కారకులైన వారిపై ఎన్నికల కమిషనర్ చర్యలుతీసుకుంటే ప్రభుత్వ పెద్దలెలా తప్పుపడతారు. హైకోర్టు తీర్పు ఉల్లంఘించిన అధికారులపై ఎస్ఈసీ చర్యలు తీసుకుంటే, మంత్రి వారిని వెనకేసుకురావటమేంటి. జరిగిన తప్పుకి మంత్రి పెద్దిరెడ్డి బాధ్యతవహిస్తారా? ఎస్ఈసీ చర్యలు తీసుకున్న అధికారులకు పదోన్నతలు కల్పిస్తామని చెప్పి కోర్టు ధిక్కారానికి పాల్పడ్డారు. దీనిపై ఎస్ఈసీకి ఫిర్యాదు చేశాం. న్యాయస్థానం తీర్పునకు వ్యతిరేకంగా, రాజ్యాంగ విరుద్ధంగా మాట్లాడిన పెద్దిరెడ్డిని తక్షణమే మంత్రివర్గం నుంచి బర్తరఫ్ చేయాలి. ఏకగ్రీవమైన పంచాయతీలకు ఇచ్చే నగదు ప్రోత్సాహకాలను జగన్ ప్రభుత్వం రూ.7లక్షల నుంచి 5 లక్షలకు తగ్గించింది. ఎప్పటినుంచో అమల్లో ఉన్న ప్రోత్సాహకాలను తమ ఘనతగా జగన్ ప్రభుత్వం చెప్పుకుంటోంది.' అని విమర్శించారు.
మీ ప్రోత్సాహకాలు ఎప్పుడు వస్తాయి: గోరంట్ల
'అధికారిక వేలంపాటలో పాల్గొనండి' అనే రీతిలో ఏకగ్రీవాలపై ప్రభుత్వ వ్యవహారం ఉందని తెదేపా సీనియర్ నేత గోరంట్ల బుచ్చయ్య చౌదరి మండిపడ్డారు. ప్రభుత్వం ప్రకటిస్తున్న ప్రోత్సాహకాలు ఎప్పుడు వస్తాయో ఎవరికీ తెలీదని విమర్శించారు. 'కోట్లు గుమ్మరించి ప్రభుత్వం ప్రకటనలు ఇస్తోంది. కనీసం అక్కడ 'తెలంగాణా'బొమ్మ కాకుండా ఆంధ్రప్రదేశ్ బొమ్మని పెట్టండి మహా ప్రభో.' అని ట్విట్టర్లో ఎద్దేవా చేశారు. 'సర్పంచ్ సీటుకి 50 లచ్చలు అంట కదా! నామినేషన్ వెయ్యలా లేక సర్పంచ్ పోస్ట్ని ఇంటికే పంపిస్తారా?' అని ధ్వజమెత్తారు.
చనిపోయిన 7150 మందికి జగన్ రెడ్డి బాధ్యత వహిస్తారా?: అయ్యన్నపాత్రుడు
రాష్ట్రంలో ఇప్పటి వరకూ కరోనాతో చనిపోయిన 7150 మందికి జగన్ రెడ్డి బాధ్యత వహిస్తారా? అని తెదేపా పొలిట్ బ్యూరో సభ్యులు అయ్యన్నపాత్రుడు ట్విట్టర్ వేదికగా నిలదీశారు. 'కరోనాతో ప్రజలు ఇబ్బంది పడితే నిమ్మగడ్డదే బాధ్యత అంటున్న అతి మేధావి విజయసాయిరెడ్డికి నా సూటి ప్రశ్న. రాష్ట్రంలో 8.87లక్షల మంది కరోనాతో ఇబ్బంది పడ్డారు. దీనికి జగన్ రెడ్డి బాధ్యత తీసుకుంటారా? మీ లెక్కల్లోనే ఇవి ప్రభుత్వ హత్యలు కాబట్టి 7,150 కుటుంబాలకు 50 లక్షలు ఆర్థిక సహాయం చేసి ప్రభుత్వం ఆదుకుంటుందా? ఎన్నికలకు భయపడటం లేదు అన్న నీ ప్రకటనలోనే భయం కనిపిస్తోంది." అని ట్వీట్ చేశారు.
వారంతా తాడేపల్లి కాంపౌండ్ దిష్టి బొమ్మలా: బండారు
'వ్యవస్థలు, కోర్టులు, వ్యక్తులు చంద్రబాబు దగ్గర కీలు బొమ్మలుగా మారాయని ప్రభుత్వ సలహాదారు సజ్జల రెడ్డి సెలవిస్తున్నారు. జగన్ రెడ్డి కోటరీలో ఉండి కోట్లు కొల్లగొట్టే సలహాదారులు తాడేపల్లి కాంపౌండ్ దిష్టిబొమ్మలా?' అని ట్విట్టర్లో తెదేపా సీనియర్ నేత బండారు సత్యనారాయణ మూర్తి ధ్వజమెత్తారు.
రాష్ట్ర ఉద్యోగుల పరిస్థితి ఏమిటో: జవహర్
తెలంగాణలో 63శాతం ఫిట్మెంట్ అడిగిన ఉద్యోగులకు అక్కడి ప్రభుత్వం 7.5 శాతం ఫిట్మెంట్తో సరిపెట్టినందున ఇక ఏపీ ఉద్యోగుల పరిస్థితి ఏమిటో గ్రహించాలని మాజీ మంత్రి జవహర్ హితవు పలికారు. 'వైకాపా ప్రభుత్వం ముందు సాగిలా పడి వ్యక్తిగత ప్రయోజనాల కోసం ఉద్యోగుల హక్కులను తాకట్టు పెట్టిన కొంతమంది సంఘాల నాయకులు ఇప్పటికైనా మేల్కొంటారా, లేక జగన్ రెడ్డికి సాష్టాంగ నమస్కారం చేసి ఉద్యోగుల్ని మోసం చేస్తారా?' అని ట్విట్టర్లో నిలదీశారు.
ప్రభుత్వ పెద్దల మాటల దాడి సుప్రీం కోర్టు తీర్పునకు వ్యతిరేకం: వర్ల
'అధికారుల మీద నిమ్మగడ్డ తీసుకున్న చర్యల్ని ఎన్నికల తర్వాత తొలగిస్తామని మంత్రులు చెప్పడం, మూకుమ్మడిగా ఆయనపై ప్రభుత్వ పెద్దలు మాటలతో దాడి చేయడం, బెదిరించడం సుప్రీంకోర్టు తీర్పునకు వ్యతిరేకం.' అని ట్విట్టర్లో తెదేపా పొలిట్ బ్యూరో సభ్యుడు వర్ల రామయ్య అన్నారు.
ఇదీ చదవండి: ద్వివేది, గిరిజా శంకర్‌పై సెన్సూర్ ప్రొసీడింగ్స్‌ను ఎస్ఈసీకి తిప్పిపంపిన ప్రభుత్వం
