రాష్ట్రంలో అతి పెద్దదైన బస్టాండ్ విజయవాడలోని పండిట్ నెహ్రూ బస్స్టేషన్. రాష్ట్రంలో అన్ని ప్రాంతాలకు మధ్యలో ఉన్న ఇక్కడి నుంచి నిరంతరం పలు రాకపోకలు సాగుతుంటాయి. నిత్యం 3 వేల బస్సులు నడుస్తుంటాయి. రాష్ట్రంలోని అన్ని జిల్లాలు, పట్టణాలకు నిరంతరం బస్సులు తిరుగుతాయి. తెలంగాణలోని హైదరాబాద్, తమిళనాడు, కర్ణాటక, సహా ఇతర రాష్ట్రాల్లోని పట్టణాలు, జిల్లాలకు ప్రయాణికులు వెళ్లివస్తుంటారు. రోజుకు లక్షమందికి పైగా ప్రయాణం చేస్తుంటారు.
ఆధునికీకరణ
లాక్డౌన్తో 2 నెలలపాటు వెలవెలబోయిన బస్టాండ్.. ఇన్నాళ్లకు మళ్లీ ప్రయాణికులతో కిటకిటలాడుతోంది. ప్రయాణికుల భద్రత దృష్ట్యా ఆర్టీసీ పటిష్ట చర్యలు తీసుకుంటోంది. బస్టాండ్లో 72 ప్లాట్ ఫాంలు ఉండగా.. వాటన్నింటినీ సీసీ కెమెరాల పరిధిలోకి తెచ్చారు. రాజధాని పరిధిలో ఉన్నందున 2016లోనే బస్టాండ్ను పూర్తిగా ఆధునీకరించి నిఘా కెమెరాలు ఏర్పాటు చేశారు. ఇటీవల వీటి సంఖ్య మరింత పెంచారు. ప్రయాణికులకు అన్ని వసతులు కల్పించారు. భద్రతకు అత్యంత ప్రాధాన్యత ఇచ్చిన అధికారులు... బస్సు ఎక్కేవారు, దిగేవారు, ప్లాట్ ఫాంపై వేచి ఉండే వారందరినీ నిరంతరం చిత్రీకరించేలా బస్టాండ్లో అత్యాధునిక సీసీ కెమెరాలు ఏర్పాటు చేశారు. వీటన్నింటినీ అనుసంధానించి కొన్నింటిని పోలీసు కమాండ్ కంట్రోల్ రూంకు.. మరికొన్ని స్థానిక కంట్రోల్ రూంకు అనుసంధానించారు. పార్కింగ్ ఏరియాలోనూ కెమెరాలు అమర్చి.. పరిస్థితులను పరిశీలించేలా ఏర్పాట్లు చేశారు.
ఎక్కడికక్కడ కెమెరాలు.. పటిష్ఠ నిఘా
బస్టాండ్లో గతంలో దొంగతనాలు ఎక్కువగా జరిగేవి. బస్ స్టేషన్ పరిసరాల్లో బ్లేడ్ బ్యాచ్లు, పోకిరీలు ఉంటూ వచ్చి పోయేవారిపై దాడులకు దిగేవారు. సీసీ కెమెరాల ఏర్పాటుతో ప్రస్తుతం బస్టాండ్ ప్రాంగణంలో వీరి బెడద పూర్తిగా తగ్గిపోయిందని అధికారులు చెప్తున్నారు. గతంలో రోజూ ఏదో ఒక కేసు పోలీసు స్టేషన్లో నమోదయ్యేది. ప్రస్తుతం చాలా తక్కువగా నమోదవుతున్నాయి. ఏదైనా ఘటన జరిగినా సీసీ కెమెరాల సహాయంతో నిందితులను పోలీసులు త్వరగా పట్టుకుంటున్నారు. దీంతో ప్రయాణికుల్లో భరోసా కలిగింది. ఇటీవల సెల్ఫోన్లు పోతున్న నేపథ్యంలో ప్రయాణికులు తమ వస్తువులను జాగ్రత్తగా చూసుకోవాలని ఆర్టీసీ అధికారులు సూచిస్తున్నారు.
బస్టాండ్ భవనంపై పలు ప్రభుత్వ విభాగాల కార్యాలయాలను గతంలో నిర్మించారు. ఆర్టీసీ కేంద్ర కార్యాలయం, ఏసీబీ, రవాణాశాఖ, విజిలెన్స్, పలు విభాగ అధిపతులు కార్యాలయాలు ఇక్కడున్నాయి. వీరు బస్టాండ్ పరిసర ప్రాంతాల్లో నిరంతరం నిఘా, భద్రతను పర్యవేక్షిస్తున్నారు. గతంలో చీకటి పడితే బస్టాండ్ పరిసర ప్రాంతాల్లో సంచరించేదుకు వెనుకాడిన ప్రయాణికులు.. ఇప్పుడు ధైర్యంగా రాకపోకలు సాగిస్తున్నారు.
ఇవీ చదవండి:
