One time settlement scheme: రాష్ట్ర వ్యాప్తంగా 39 లక్షల మంది లబ్ధిదారులకు సంబంధించిన గృహ హక్కు పత్రాలు ప్రభుత్వం వద్దే ఉన్నాయని గృహ నిర్మాణ శాఖ ముఖ్య కార్యదర్శి అజయ్ జైన్ తెలిపారు. హౌసింగ్ కార్పొరేషన్ వద్ద 4 వేల కోట్ల రూపాయల బకాయిలు ఉన్నాయని వెల్లడించారు. అసలు మొత్తం తక్కువగా ఉన్నా వడ్డీ బాగా పెరిగిందన్నారు. అందుకే వన్ టైమ్ సెటిల్మెంట్ పథకాన్ని సీఎం ప్రకటించారని స్పష్టం చేశారు.
రుణం ఎంత ఉన్నప్పటికీ ప్రభుత్వం 10 వేలు తీసుకుని హక్కు పత్రాలు ఇవ్వాలని నిర్ణయం తీసుకున్నామని పేర్కొన్నారు. అందుకే గ్రామీణ, పట్టణ ప్రాంతల్లోని వారికి రిజిస్ట్రేషన్ టైటిల్ ఇవ్వాలన్నదే ప్రభుత్వ ఆలోచన అని అన్నారు. తద్వారా వారు గృహాలకు సొంతదారులు అవుతారని తెలిపారు. రుణాలు, విక్రయం చేసేందుకు వీలుకలుగుతుందని స్పష్టం చేశారు.
ప్రభుత్వం రిజిస్ట్రేషన్, యూజర్ చార్జీలు కూడా మాఫీ చేసిందని జైన్ తెలిపారు. అంతా సబ్ రిజిస్ట్రార్ ఆఫీసుల చుట్టూ తిరక్కుండా గ్రామ సచివాలయాలల్లోనే రిజిస్ట్రేషన్ చేసుకోవచ్చని వెల్లడించారు. 22 ఏ జాబితా నుంచి కూడా వారి స్థలాలను తొలగిస్తామని ప్రభుత్వం చెప్పిందన్నారు. ఇవన్నీ లబ్ది దారులకు ప్రయోజనం కలిగించేవేనని.. అయితే ఇది స్వచ్ఛంద పథకం మాత్రమేనన్నారు. డిసెంబర్ 8 నుంచి రిజిస్ట్రేషన్ ప్రక్రియ ప్రారంభం అవుతుందన్నారు. ప్రజల నుంచి మంచి స్పందన ఉందని ఆశిస్తున్నామన్నారు. ఎక్కడా సిబ్బందికి లక్ష్యాలను విధించలేదని తెలిపారు. ప్రజల వద్దకు ఈ పథకాన్ని తీసుకువెళ్లాలన్నదే తమ లక్ష్యమని స్పష్టం చేశారు. మిగతా సంక్షేమ పథకాల అమలుపై దీని ప్రభావం పడదని అన్నారు. హౌసింగ్ కార్పొరేషన్ వద్ద రుణం తీసుకున్న వారికి మాత్రమే ఈ లబ్ది కల్పించాలని నిర్ణయం తీసుకున్నట్లు పేర్కొన్నారు. కార్పొరేషన్ దాదాపు 10 వేల కోట్ల మేర బకాయిలు రద్దు చేస్తోందని తెలిపారు. 10 వేల రూపాయలన్నది విధాన పరమైన నిర్ణయమని.. ఆ మొత్తం చెల్లించాల్సిందేనని స్పష్టం చేశారు.
ఇదీ చదవండి: minister botsa on OTS: ఈ నెల 20 నుంచి ఇళ్ల రిజిస్ట్రేషన్ ప్రారంభిస్తాం: మంత్రి బొత్స
