కర్ఫ్యూ అంటే అలా కాదు... ఇలా కూడా ఉంటుంది..!

కర్ఫ్యూ... ఒకప్పుడు ఈ మాట వినగానే ప్రజల గుండెల్లో బయటకు చెప్పలేని భయం ఉండేది. ఏ నగరంలో చూసినా పోలీసుల బందోబస్తు, బారికేడ్లు కనిపిస్తాయి. పోలీసులు అలా చేస్తారు.. ఇలా చేస్తారు అనే మాటలు వినబడేవి. మనమంతా పోలీసుల నిఘాలో ఉంటాం. ఏ పని చేయాలన్నా పోలీసుల అనుమతి ఉండాల్సిందే. కానీ ఇవాళ పాటించిన జనతా కర్ఫ్యూ ఇందుకు పూర్తి విరుద్ధం. ప్రజలే స్పచ్ఛందంగా తమతమ ఇళ్లకు పరిమితమై జాతి ఐక్యతను చాటారు. ఇది చరిత్రిలో నిలిచిపోయే రోజు.

కారణం ఏదైనా... దేశ ప్రధాని పిలుపు, ప్రస్తుత పరిస్థితి దృష్ట్యా దేశ ప్రజలు, ప్రధానంగా తెలుగు ప్రజలు తమ బాధ్యతను చాటుకున్నారు. ప్రతీఒక్కరూ ఒక సైనికుడిలా పనిచేశారు. జనతా కర్ఫ్యూలో పోలీసుల పాత్ర ఉన్నప్పటికీ... ప్రజల సహకారం మాటల్లో చెప్పలేనిది. దేశంలోని ప్రధాన నగరాలైన దిల్లీ, ముంబయి, కోల్​కతా, చెన్నై, హైదరాబాద్, బెంగళూరు నగరాలు నిర్మానుష్యంగా మారడమే ఇందుకు నిదర్శనం.

రాష్ట్రంలోని ప్రధాన నగరాలు విశాఖ, రాజమహేంద్రవరం, విజయవాడ, తిరుపతి, నెల్లూరు ప్రజలు స్పచ్ఛందంగా కర్ఫ్యూ పాటించారు. ఏదైనా విపత్కర పరిస్థితి వచ్చినప్పుడు ప్రజల భాగస్వామ్యం ఉంటే దానిని ఎదుర్కొవడం పెద్ద విషయం కాదని నిరూపించారు ప్రజలు. ఇదే స్పూర్తితో పౌరులు ఉంటే కరోనా కోరలు చాచకుండా నిరోధించడం కష్టమేమి కాదని ప్రభుత్వాలకూ నమ్మకం కుదిరింది.

ఇలాంటి అత్యవసర పరిస్థితిలో తమ ప్రాణాలను లెక్కచేయకుండా... విధులు నిర్వహించిన వైద్య సిబ్బంది, విద్యుత్తు, వాటర్ సప్లయ్, పోలీసుల, ఇతర శాఖల వారి సేవలు మరువలేనివి. వీరి సేవలను గుర్తిస్తూ దేశవ్యాప్తంగా ప్రజలు చప్పట్లతో అభినందనలు తెలిపారు. ఏది ఏమైనా కర్ఫ్యూ అంటే ఇలా కూడా ఉంటుందా అనేలా ప్రజలు సహకరించడం అభినందనీయం. ఇలాగే 130 కోట్ల మంది భారతీయులు బాధ్యతగా కరోనా మహమ్మారిని ఎదుర్కొవాలని ఆశిద్దాం.

ఇదీ చదవండి: కరోనా ఎఫెక్ట్​: మార్చి 31 వరకు తెలంగాణలో లాక్‌డౌన్‌