PRC: జీతం నుంచి రికవరీ చేస్తే తీవ్రంగా పరిగణిస్తాం.. ప్రభుత్వానికి హైకోర్టు హెచ్చరిక

AP High Court on PRC: పీఆర్సీ వ్యవహారంపై హైకోర్టులో విచారణ జరిగింది. ఉద్యోగస్తులకు నష్టం చేకూరేలా జీవోలున్నాయని పిటిషనర్​ తరపు న్యాయవాది వాదనలు వినిపించారు. వాదనలు విన్న న్యాయస్థానం.. ప్రభుత్వం జారీ చేసిన జీవోలను పిటిషనర్‌కు ఇవ్వాలని ఆదేశించింది.

AP High Court on PRC: పీఆర్సీ వ్యవహారంపై ఏపీ గెజిటెడ్ ఆఫీసర్స్ జేఏసీ ఛైర్మన్ కృష్ణయ్య దాఖలు చేసిన పిటిషన్​పై ఇవాళ హైకోర్టులో విచారణ జరిగింది. ఉద్యోగస్తులకు నష్టం చేకూరేలా జీవోలున్నాయని పిటిషనర్​ తరపు న్యాయవాది రవితేజ వాదనలు వినిపించారు. జీతం నుంచి రికవరీ చేస్తామని ప్రభుత్వం చెబుతుందని న్యాయవాది ధర్మాసనం దృష్టికి తీసుకొచ్చారు.

వాదనలు విన్న న్యాయస్థానం..పీఆర్సీపై ప్రభుత్వం జారీ చేసిన జీవోలను పిటిషనర్​కి ఇవ్వాలని ప్రభుత్వాన్ని ఆదేశించింది. కౌంటర్​తో పాటు పీఆర్సీ నివేదికను దాఖలు చేయాలని స్పష్టం చేసింది. జీతం నుంచి రికవరీ చేసినట్లయితే తీవ్రంగా పరిగణిస్తామని ప్రభుత్వాన్ని హైకోర్టు హెచ్చరించింది. అనంతరం తదుపరి విచారణను రెండు వారాలకు వాయిదా వేసింది.

ఇదీ చదవండి