విజయనగరం జిల్లా గజపతినగరం సబ్ రిజిస్ట్రార్ కార్యాలయంలో.. 69 నకిలీ చలానాలతో 21 లక్షల అవినీతికి పాల్పడినట్లు గుర్తించారు. జిల్లా రిజిస్ట్రార్ సహా మరికొందరు అధికారులు.. కార్యాలయంలోని వివిధ దస్త్రాలను పరిశీలించగా ఈ విషయం బయటపడింది. సహాయ లేఖరి గణేష్‌పై.. సబ్ రిజిస్ట్రార్ ఈశ్వరమ్మ గజపతినగరం పోలీసులకు ఫిర్యాదు చేశారు.
మంగళగిరిలో 8 లక్షలు..
గుంటూరు జిల్లా మంగళగిరిలోనూ నకిలీ చలానాల బాగోతం బట్టబయలైంది. నలుగురు లేఖరుల చేతివాటంతో.. 8 దస్త్రాలకు రిజిస్ట్రేషన్ చేయించే సమయంలో 8 లక్షలు పక్కదారి పట్టించినట్లు తేలింది. సీఎంఎఫ్ఎస్ చేపట్టిన రాష్ట్రవ్యాప్త తనిఖీల్లో ఈ అవినీతి వెలుగుచూసింది. ఆ సొమ్మును ఇప్పటికే రికవర్‌ చేశామన్న రిజిస్ట్రార్ రాధాకృష్ణమూర్తి.. పోలీసులకు ఫిర్యాదు చేసినట్లు తెలిపారు.
నంద్యాల సబ్ రిజిస్ట్రార్ కార్యాలయంలో..
కర్నూలు జిల్లా నంద్యాల సబ్ రిజిస్ట్రార్ కార్యాలయంలో.. 54 దస్త్రాలకు సంబంధించి 7లక్షల 40వేల రూపాయల గోల్‌మాల్ జరిగింది. ఈ వ్యవహారంలో సబ్ రిజిస్ట్రార్ సోఫియా బేగం, జూనియర్‌ అసిస్టెంట్ వీరన్నపై సస్పెన్షన్ వేటు పడింది. మరో నలుగురు లేఖరులకూ ఈ అక్రమంలో భాగముందన్న ఆరోపణల నేపథ్యంలో వారిపైనా చర్యలకు అధికారులు సిద్ధమవుతున్నారు.
ఇదీ చదవండి:
polycet-2021: సెప్టెంబరు 1న పాలిటెక్నిక్ ఉమ్మడి ప్రవేశ పరీక్ష
