ఆన్లైన్లో యువతుల పేరుతో ఖాతాలు తెరిచి అమ్మాయిలను మోసగిస్తోన్న యువకుడిని హైదరాబాద్ సైబర్ క్రైమ్ పోలీసులు అరెస్టు చేశారు. మణికొండలో ఉంటూ అమెజాన్ కంపెనీలో ఉద్యోగం చేస్తున్న సుమంత్.. ఇన్స్టాగ్రామ్లో అమ్మాయిల పేరుతో ఖాతా తెరిచి.. పలువురు యువతులతో చాటింగ్ చేసేవాడు. క్రమంగా వారితో స్నేహం పెంచుకుని.. వారి ఫొటోలు సేకరించి బెదిరింపులకు పాల్పడటం మొదలుపెట్టాడు. అసభ్యకర ఫొటోలు పంపి వేధించేవాడు.
ఓ బాధితురాలి ఫిర్యాదు మేరకు రంగంలోకి దిగిన హైదరాబాద్ సైబర్ క్రైమ్ పోలీసులు సుమంత్ను అరెస్టు చేశారు. ఇప్పటికే 70 మంది అమ్మాయిలను బెదిరించినట్లు పోలీసులు తెలిపారు. నిందితుడు విజయవాడకు చెందిన వాడని వెల్లడించారు.
'నకిలీ ఇన్స్టాగ్రామ్ ఖాతాను తెరిచి ఇంటర్నెట్లో నుంచి అందమైన అమ్మాయి ఫొటో డౌన్లోడ్ చేసి ప్రొఫైల్ తయారు చేస్తాడు. అమ్మాయిలా వేరే యువతులకు రిక్వెస్ట్ పంపిస్తాడు. అమ్మాయేగా అని రిక్వెస్ట్ యాక్సెప్ట్ చేసిన వాళ్లతో చాటింగ్ మొదలుపెడతాడు. అమ్మాయితోనే మాట్లాడుతున్నామని భావించిన యువతులు.. సన్నిహితంగా మెలిగే తరుణంలో.. వారికి అసభ్యకరమైన ఫొటోలు పంపి.. వేధింపులకు పాల్పడతాడు. వారి ఫొటోలు మార్ఫింగ్ చేసి బెదిరింపులకు పాల్పడతాడు' అని హైదరాబాద్ సైబర్ క్రైమ్ ఏసీపీ ప్రసాద్ తెలిపారు.
ఇలాంటి కేసులు రోజురోజుకు పెరుగుతున్నాయని ఏసీపీ ప్రసాద్ వెల్లడించారు.. ఇలాంటి వారిని గుర్తించడం కష్టమని చెప్పారు. సోషల్ మీడియాలో అమ్మాయిలు.. తెలియని వారితో చాటింగ్ చేయకూడదని సూచించారు.
- ఇదీ చూడండి : వలస ఓటర్లకు అభ్యర్థుల వర్తమానాలు
