'ఆంధ్రప్రదేశ్‌ ప్రభుత్వం వర్తమానం అందించింది'

పోలవరం కాంట్రాక్టుల్లో ఎలాంటి ఉల్లంఘనలూ జరగలేదని, అన్ని పనులూ సంబంధిత అధీకృత సంస్థ అనుమతులు తీసుకున్న తర్వాతే మొదలుపెట్టినట్లు ఆంధ్రప్రదేశ్‌ ప్రభుత్వం తమకు వర్తమానం అందించినట్లు కేంద్ర జలవనరులశాఖ ప్రధానమంత్రి కార్యాలయానికి నివేదించింది.

పోలవరం ప్రాజెక్టు నిర్మాణంలో భారీ ఎత్తున అవకతవకలు, అవినీతి జరుగుతున్నట్లు పెంటపాటి పుల్లారావు రాసిన లేఖను ప్రధాన మంత్రి కార్యాలయం జల్‌శక్తి మంత్రిత్వశాఖకు పంపి వివరణ కోరింది. దీనితో ఆ శాఖ సీనియర్‌ జాయింట్‌ కమిషనర్‌ అనూప్‌ కుమార్‌ శ్రీవాస్తవ ఈనెల 5న ప్రధానమంత్రి కార్యాలయ డైరెక్టర్‌ రాజేంద్రకుమార్‌కు వివరాలు పంపారు. ఆంధ్రప్రదేశ్‌ ప్రభుత్వం 2019 నవంబరు 13న లేఖలో రాసిన అంశాలను ఆయన వివరించారు. ‘

‘సంబంధిత అధీకృత సంస్థల ఆమోదం తీసుకున్న తర్వాతే అన్ని నిర్ణయాలూ జరిగాయి. పనుల్లో కానీ, ఎం బుక్కు నమోదులో కానీ తేడాలున్నాయేమోనని విజిలెన్స్‌ అండ్‌ ఎన్‌ఫోర్స్‌మెంట్‌ డిపార్ట్‌మెంట్‌ పరిశీలిస్తోంది. ఒకసారి అది నివేదిక సమర్పిస్తే నిబంధనలు, విజిలెన్స్‌కోడ్‌కు అనుగుణంగా తదుపరి చర్యలు తీసుకుంటామని అని ఏపీ ప్రభుత్వం తమకు చెప్పినట్లు ఆయన పేర్కొన్నారు.

గత కాంట్రాక్టర్‌ పనులను నిదానంగా చేయడం వల్లే అతన్ని తప్పించి కొత్త సంస్థకు 60(సి) కింద నామినేషన్‌ పద్ధతిన పనులు అప్పగించినట్లు ఆయన వివరించారు. ధరలు, పనులు పెరగడం, కొత్త భూసేకరణ చట్టం అమల్లోకి రావడంవల్లే ప్రాజెక్టు అంచనా వ్యయం పెరిగినట్లు స్పష్టం చేశారు. వీటన్నింటినీ జల్‌శక్తి మంత్రిత్వశాఖ పరిధిలోని రివైజ్డ్‌ కాస్ట్‌ ఎస్టిమేట్‌ కమిటీ కూలంకషంగా పరీక్షిస్తోందని తెలిపారు. ఆరోపణలొచ్చిన అధికారులపై విచారణ సాగుతున్నట్లు వివరించారు.

ఇదీ చదవండీ... పోలవరం సవరణ అంచనాల్లో 7,800కోట్లు కోత