'సింగపూర్‌ వెళ్లి మరీ ఏపీ ప్రతిష్ట దెబ్బతీశారు'

సింగపూర్ వెళ్లి ఏపీ ప్రతిష్ట దెబ్బతీసేలా బుగ్గన మాట్లాడారని తెదేపా సీనియర్ నేత యనమల రామకృష్ణుడు విమర్శించారు. ప్రపంచ బ్యాంకు, ఏషియన్ బ్యాంకు రుణాలు రాకుండా చేశారని అన్నారు. ఇప్పుడు అమరావతికి నిధులు లేవని చేతులెత్తేశారని మండిపడ్డారు. ఇంతకన్నా దివాళా కోరుతనం ఏముంటుంది? అని ప్రశ్నించారు.

ప్రపంచ బ్యాంకు, ఏషియన్ బ్యాంకు రుణాలు రాకుండా చేసి.. ఇప్పుడు అమరావతికి నిధుల్లేవని ప్రభుత్వం చేతులెత్తేసిందని మండలి ప్రతిపక్షనేత యనమల రామకృష్ణుడు ధ్వజమెత్తారు. అమరావతి అభివృద్ధికి నిధుల్లేవని ఆర్థికమంత్రి బుగ్గన చేసిన వ్యాఖ్యలపై ఆయన మండిపడ్డారు. సింగపూర్ వెళ్లి ఏపీ ప్రతిష్ట దెబ్బతీసేలా మాట్లాడారని విమర్శించిన యనమల... ఇంతకన్నా దివాళా కోరుతనమేముంటుందని ప్రశ్నించారు. అమరావతి అభివృద్ధితోపాటే 13 జిల్లాల అభివృద్ధికి తెదేపా కృషి చేసినప్పుడు... వైకాపా వల్ల ఎందుకు కావడం లేదని నిలదీశారు. హిట్లర్‌ను గోబెల్స్ ముంచేస్తే, ఇప్పుడు జగన్‌ను తన మీడియా ముంచేస్తోందని ఎద్దేవా చేశారు. రాష్ట్రంలో ఆర్థిక కార్యకలాపాలను చావుదెబ్బ తీసి, ఇన్ని నిర్వాకాలు చేస్తే ప్రజలు జగన్‌ను ఎలా ప్రశంసిస్తారో చెప్పాలన్నారు.