రైతుల కోసం తెలుగుదేశం ఆందోళన కార్యక్రమాలు చేపట్టింది. నేటి నుంచి 3 రోజులపాటు రాష్ట్రవ్యాప్తంగా 'రైతు కోసం తెలుగుదేశం' కార్యక్రమాలు నిర్వహిస్తోంది. తొలిరోజు కార్యక్రమంలో భాగంగా 175 నియోజకవర్గాల్లో ఆత్మహత్య చేసుకున్న రైతులు, రైతుకూలీల ఇళ్లకు తెదేపా నాయకులు వెళ్లి పరామర్శిస్తున్నారు.
గుంటూరు జిల్లా వేమూరు నియోజకవర్గంలో ఇటీవల ఆత్మహత్య చేసుకున్న కౌలు రైతులను మాజీమంత్రి నక్కా ఆనందబాబు పరామర్శించారు. కౌలు రైతులను ఆదుకోవడంలో ప్రభుత్వ విఫలమైందని ఆరోపించారు. పంట నష్టపోయిన రైతులకు నష్టపరిహారం చెల్లించాలని డిమాండ్ చేశారు. ఆత్మహత్య చేసుకున్న రైతులకు రూ.20 లక్షలు తగ్గకుండా నష్టపరిహారం అందించాలని నక్కా ఆనందబాబు కోరారు.
రైతులకు 2018, 2019 పంట బీమా చెల్లించాలని డిమాండ్ చేస్తూ అనంతపురం జిల్లా బుక్కరాయసముద్రం తహసీల్దార్ కార్యాలయం ఎదుట తెదేపా నేతలు నిరసన చేపట్టారు. ఇప్పటికైనా స్పందించి రైతుల ఖాతాలో బీమా జమ చేయాలని డిమాండ్ చేశారు.
అనంతపురం జిల్లా అమరాపురం మండలం వి. అగ్రహారం గ్రామంలో ఆత్మహత్య చేసుకున్న మహిళా రైతు కుటుంబాన్ని తెదేపా నేతలు పరామర్శించారు. రైతు కుటుంబానికి ప్రభుత్వం సహాయం చేయకపోవటంపై ఎమ్మెల్సీ తిప్పేస్వామి ఆగ్రహం వ్యక్తం చేశారు. మహిళా రైతు కుటుంబానికి తెదేపా అండగా ఉంటుందని హామీ ఇచ్చారు.
వైకాపా ప్రభుత్వం రైతులను దగా చేస్తుందని తెదేపా తిరుపతి పార్లమెంట్ అధ్యక్షులు నరసింహ యాదవ్ ఆరోపించారు. తిరుపతి పార్టీ కార్యాలయంలో రాష్ట్రంలోని రైతుల సమస్యలపై అఖిలపక్ష సమావేశం నిర్వహించారు. ఈ సమావేశంలో మాజీ ఎమ్మెల్యే సుగుణమ్మ, సీపీఎం, రైతు సంఘాలు, లోక్సత్తా, ఆమ్ ఆద్మీ తదితర పార్టీల నాయకులు పాల్గొన్నారు.
ఇదీ చదవండి: ఇళ్ల పంపిణీ నిరంతర ప్రక్రియ: సీఎం జగన్
