ప్రధాని మోదీని కలిసి రాష్ట్రానికి సంబంధించిన అంశాలను వివరించినట్టు.. ఎంపీ రఘురామకృష్ణరాజు చెప్పారు. రాష్ట్రంలో ఆలయాలపై జరుగుతున్న దాడులు, అమరావతి అంశాలను ఆయన దృష్టికి తీసుకెళ్లానని దిల్లీలో తెలిపారు. రాజధాని రైతులకు జరుగుతున్న అన్యాయాన్ని వివరించినట్టు చెప్పారు. అమరావతిపై మోదీ సానుకూలంగా ఉన్నట్లు.. ఆయన ముఖకవళికల ద్వారా స్పష్టంగా అర్థమైందన్నారు. అమరావతిలో ఇప్పటికే వేల కోట్లతో భవనాలు కూడా నిర్మాణం పూర్తయిందని.. ఉద్యోగులకు జీతాలే ఇవ్వలేని పరిస్థితుల్లో విశాఖలో కొత్త రాజధాని ఏర్పాటు అసాధ్యమని ప్రధాని దృష్టికి తీసుకెళ్లానని చెప్పారు.
"అమరావతిపై ప్రధాని మోదీ చాలా సానుకూలంగా కనిపించారు. విశాఖ స్టీల్ ప్లాంట్పై ఆంధ్రుల మనోభావాలను ఆయన దృష్టికి తీసుకెళ్లాను. అన్ని అంశాలను పరిగణించాకే నిర్ణయం ఉంటుందని ప్రధాని చెప్పారు. విశాఖ వాసుల సెంటిమెంట్ ను ప్రధాని కాపాడుతారని నాకు నమ్మకం ఉంది. రాష్ట్రంలో మత మార్పిడులపై 25 పేజీల నివేదికను ప్రధానికి ఇచ్చాను. ఈ అంశంపై కేంద్రం దృష్టికి ఎప్పటికప్పుడు తీసుకెళ్తున్నాను.. ఒక్క క్రిస్టియన్ కూడా లేని గ్రామాల్లో 10 చర్చిలు ఉన్నాయి" - రఘురామకృష్ణరాజు, ఎంపీ
వ్యవసాయ చట్టాలపై ప్రధానికి కొన్ని సూచనలు చెప్పానని రఘురామ చెప్పారు. సీఎం జగన్.. పార్టీ ఎంపీలను వెంటబెట్టుకుని ప్రధానిని కలవాలని.. విశాఖ ఉక్కు పరిశ్రమ ప్రైవేటీకరణ ప్రతిపాదనను వెనక్కు తీసుకునేలా విజ్ఞప్తి చేయాలని ఆయన అన్నారు. ఎన్నికలు అంటే ఏకగ్రీవాలకు ప్రాధాన్యత ఇవ్వకుండా ప్రజాస్వామ్యాన్ని పరిరక్షించాలని.. రాబోయే మున్సిపల్, ఎంపీటీసీ, జెడ్పీటీసీ ఎన్నికల్లో మంచి చేయాలని అనుకునే వాళ్లంతా పాల్గొనాలని చెప్పారు. నదదు లావాదేవీలకు సంబంధించి.. ఏదైనా ఖాతా డిఫాల్ట్ అయితే ఫ్రాడ్ అని డిక్లేర్ చేయాల్సిందిగా ఆర్బీఐ సర్క్యులర్ ఉందన్న ఆయన... తనపై కక్షతో ఆ సర్క్యులర్ ను ఉపయోగించుకుని దాడి చేయించారంటూ ఆవేదన చెందారు. తాను కోర్టుకు వెళ్తే.. స్టే వచ్చిందని చెప్పారు. కొడాలి నాని మీద చర్యలు తీసుకున్నట్లే మంత్రి పెద్దిరెడ్డి పై కూడా చర్యలు తీసుకోవాలని రఘురామ అభిప్రాయపడ్డారు. బడ్జెట్పై పార్లమెంట్లో విపక్షాలకు.. కేంద్ర ఆర్థిక మంత్రి నిర్మలా సీతారామన్ చక్కగా సమాధానం ఇచ్చారని ప్రశంసించారు.
ఇదీ చదవండి: మంత్రి కొడాలి నానిపై కేసు నమోదుకు ఎస్‌ఈసీ ఆదేశం
