రెండేళ్లలో సుమారు కోటి 30 లక్షల విలువ చేసే గంజాయి సరఫరా చేసిన ముఠాను తెలంగాణలోని భద్రాద్రి కొత్తగూడెం జిల్లా భద్రాచలం పోలీసులు అరెస్ట్ చేశారు. బస్టాండ్ సమీపంలో వాహనాలు తనిఖీ చేస్తుండగా... నలుగురు అనుమానాస్పదంగా కనిపించటంతో విచారించారు. వారి వద్ద ఉన్న బ్యాగులు తనిఖీ చేయగా... అందులో గంజాయి గుర్తించారు. మరి కొంతమంది నిందితులు పరారీలో ఉన్నట్లు పోలీసులు వెల్లడించారు. పట్టుబడిన వారిలో ముగ్గురు ఖమ్మం వాసులు కాగా.. ఒకరు ఏపీకి చెందిన వారు ఉన్నారు.
నిందితుల నుంచి దాదాపు ఆరు లక్షల విలువ చేసే 40 కేజీల గంజాయితో పాటు ఓ ద్విచక్రవాహనం స్వాధీనం చేసుకున్నారు. ఏపీలోని విశాఖపట్నంకు చెందిన కొర్రా ధారబాబు అనే వ్యక్తి గంజాయి సరఫరా చేస్తున్నట్లు పోలీసులు గుర్తించారు. అతనితో పాటు మరో నలుగురు ఒక ముఠాగా ఏర్పడి సుమారు రెండు సంవత్సరాల నుంచి గంజాయిని అక్రమంగా రవాణా చేస్తున్నారు. అతనిపై భద్రాచలం పోలీసు స్టేషన్లో 8 కేసులున్నాయని ఏఎస్పీ వినీత్ తెలిపారు.
ముత్తినేని కిషన్ కుమార్ అనే వ్యక్తి వీరికి ఆర్థిక సాయం చేస్తూ గంజాయిని ఖమ్మం, హైదరాబాద్ తదితర ప్రాంతాలలో విక్రయిస్తున్నట్లు పోలీసులు గుర్తించారు. ఇతనిపై కూడా 4 కేసులు నమోదై ఉన్నట్లు ఏఎస్పీ వెల్లడించారు. వీరందరిపై కేసు నమోదు చేసి రిమాండ్కు తరలిస్తున్నట్లు పేర్కొన్నారు. పరారీలో ఉన్న వారికోసం ప్రత్యేక బృందాలతో గాలింపు చేపట్టినట్లు ఏఎస్పీ వినీత్ తెలిపారు.
