కరోనా కారణంగా మార్చి నెలకు సంబంధించి ఏప్రిల్‌లో తీసే స్పాట్‌ బిల్లింగ్‌ను విద్యుత్తు శాఖ నిలిపేసింది. దీంతో విద్యుత్ వినియోగదారులు మార్చి నెలలో వినియోగించిన యూనిట్లను ఏప్రిల్‌ నెల వినియోగంతో కలిపి మేలో విద్యుత్తు శాఖ బిల్లులను జారీ చేస్తోంది. దీని ఆధారంగా డిస్కంలు మేలో విద్యుత్తు ఛార్జీలను వసూలు చేస్తున్నాయి. లాక్‌డౌన్‌ కారణంగా ప్రజలు ఇళ్లకే పరిమితం కావడం, వేసవి కాలం తోడవ్వడంతో మార్చి, ఏప్రిల్‌ నెలల్లో గృహ విద్యుత్తు వినియోగం పెరిగింది. దీనికి తోడు రెండు నెలల్లో వినియోగించిన మొత్తం యూనిట్లను కలిపి..ఆపై వాటిని సగటు చేయడంతో కేటగిరి మారిపోయి బిల్లులు ఎక్కువగా వస్తున్నాయి. ఏప్రిల్‌లో వాస్తవ విద్యుత్తు వినియోగం ఆధారంగా బిల్లులు జారీ చేసి ఉంటే ప్రస్తుత పరిస్థితి ఉండేది కాదని వినియోగదారుల వాదనగా ఉంది.
- తిరుపతికి చెందిన ఓ వినియోగదారుడికి మార్చి, ఏప్రిల్‌ నెలలకు కలిపి మేలో మీటర్‌ రీడింగ్‌ తీసి 531 యూనిట్లకు రూ.2,542 బిల్లు తేల్చారు. ఇందులోంచి ఫిబ్రవరి నెల విద్యుత్ వినియోగం ఆధారంగా ఆయన చెల్లించిన రూ.450 మినహాయించి రూ.2,092 చెల్లించాలని విద్యుత్తు శాఖ బిల్లు జారీ చేసింది. ఈయన బిల్లు సీ-కేటగిరిలో వచ్చింది.
- అనంతపురం జిల్లా కళ్యాణదుర్గం మండలానికి చెందిన వినియోగదారునిదీ ఇదే పరిస్థితి. మార్చి, ఏప్రిల్‌ నెలలకు కలిపి మీటర్‌ రీడింగ్‌ 525 యూనిట్లకు రూ.2,522 మొత్తానికి బిల్లు చేశారు. చెల్లించిన రూ.596 మినహాయించి ఇంకా రూ.1,926 చెల్లించాలని విద్యుత్తు శాఖ పేర్కొంది.
ఇవీ చదవండి...'మాకు ఇష్టం లేదు... కేంద్రం చెప్పిందనే మందుషాపులు తెరిచాం'
