నవంబర్ 16న సినిమా డైరెక్టర్ ఎన్.శంకర్ పెళ్లి రోజు. ఈ వేడుకను పురస్కరించుకుని శంకర్ అభిమాని అయిన తెరాస పార్టీకి చెందిన తెలంగాణలోని రంగారెడ్డి జిల్లా ఎస్సీ సెల్ ఉపాధ్యక్షుడు చింతకుంట విష్ణు... వినూత్న రీతిలో తన అభిమానాన్ని చాటుకున్నాడు. తెలంగాణ రాష్ట్రం జోగులంబ గద్వాల జిల్లా అలంపూర్లో ఒక్క రూపాయికి క్వార్టర్ చొప్పున మద్యం పంపిణీ చేశారు. ఈ పంపిణీ కార్యక్రమాన్ని ఒక గంట పాటు మాత్రమే కొనసాగించారు.
విషయం తెలుసుకున్న మందుబాబులు పెద్దసంఖ్యలో వైన్స్ వద్దకు చేరుకున్నారు. పంపిణీకి గంట సమయం మాత్రమే కేటాయించటం వల్ల కొంత మందిని మాత్రమే ఆ అదృష్టం వరించింది. పరిమిత కాలంలో టోకెన్లు దక్కించుకున్న 45 మంది ఒక్క రూపాయి చెల్లించి మద్యాన్ని అందుకోగలిగారు. భౌతికదూరం పాటింపజేస్తూ... పంపిణీ కార్యక్రమాన్ని నిర్వహించారు. క్వార్టర్ తీసుకున్న లబ్ధిదారులు అమితానందం వ్యక్తం చేశారు. టోకెన్లు అందుకోలేకపోయిన చాలా మంది నిరాశతో వెనుదిరిగారు. అనంతరం అన్నదాన కార్యక్రమాన్ని సైతం విష్ణు నిర్వహించారు.
తెలంగాణ ఉద్యమ సమయం నుంచి శంకర్తో పరిచయం ఉందని విష్ణు తెలిపారు. ఆయనపై అభిమానంతోనే పెళ్లిరోజు సందర్భంగా ఈ వినూత్న కార్యక్రమం నిర్వహించానని వివరించారు.
