జనవరి మూడో వారంలో కరోనా టీకా పంపిణీకి వేగంగా ఏర్పాట్లు

రాష్ట్రంలో జనవరి 3వ వారంలో కరోనా టీకా పంపిణీకి ఏర్పాట్లు వేగంగా సాగుతున్నాయి. ఇందుకోసం ప్రత్యేక వైద్య బృందాలు సిద్ధం అవుతున్నాయి. ప్రతి జిల్లా కేంద్రంలో ఫిజిషియన్లు, కార్డియాలజిస్టులు, న్యూరాలజిస్టులు, పల్మనాలజిస్టులతో ప్రత్యేక కమిటీ ఏర్పాటు చేయనున్నారు. బోధనాసుపత్రులు, జిల్లా ఆసుపత్రుల్లోనూ ఈ కమిటీలు ఏర్పడనున్నాయి.

కొవిడ్‌ టీకా పంపిణీలో భాగంగా ప్రత్యేక వైద్య బృందాలు ఏర్పాటవుతున్నాయి. టీకా వేశాక ఎవరైనా అనారోగ్యానికి గురైతే వెంటనే చికిత్సనందించేందుకు ఈ బృందాలను సిద్ధం చేస్తున్నారు. ప్రతి జిల్లా కేంద్రంలో జనరల్‌ ఫిజిషియన్లు, కార్డియాలజిస్ట్‌, న్యూరాలజిస్ట్‌, పల్మనాలజిస్టులతో ప్రత్యేక కమిటీ ఏర్పడనుంది. బోధనాసుపత్రి, జిల్లా ఆసుపత్రుల్లోనూ ఈ కమిటీలు ఏర్పడనున్నాయి. బోధనాసుపత్రులు, జిల్లా ఆసుపత్రుల్లో 20 చొప్పున.. ప్రాంతీయ ఆసుపత్రుల్లో పది చొప్పున ప్రత్యేకంగా పడకలు కేటాయించనున్నారు. సీహెచ్‌సీలో తప్పకుండా జనరల్‌ ఫిజిషియన్‌ ఉండేలా చర్యలు తీసుకోనున్నారు. జనవరి మూడోవారం నుంచి టీకాలు వేసే అవకాశాలున్నాయని భావిస్తున్నారు. తొలివిడత సుమారు 5వేల కేంద్రాలను ఏర్పాటుచేసే అవకాశముంది. ప్రతి కేంద్రంలో రోజుకు సుమారు వంద మందికి టీకా వేసే అవకాశం ఉంది. తొలి విడత టీకాను 30 రోజుల్లో పూర్తి చేసేందుకు వీలుగా సౌకర్యాలు కల్పిస్తున్నారు. కేంద్ర మార్గదర్శకాల మేరకు టీకా పంపిణీ చేస్తారు.

త్వరలో గ్రామ సభలు

టీకా పంపిణీలో ఇతర శాఖలను భాగస్వాములను చేస్తున్నారు. మహిళా శిశు సంక్షేమం, పంచాయతీరాజ్‌, మున్సిపల్‌/కార్పొరేషన్‌, విద్యాశాఖ, వైద్య విద్యార్థులు, ఎన్‌సీసీ కేడెట్ల సేవలు కీలకమవనున్నాయి. వీరికి ప్రత్యేకంగా శిక్షణ కార్యక్రమాలను వైద్య ఆరోగ్య శాఖ ఖరారు చేసింది. టీకా పంపిణీ, ప్రాధాన్యంపై స్థానికుల్లో అవగాహనను పెంచేందుకు అంగన్‌వాడీ కార్యకర్తలు, ఆశాలకు శిక్షణనివ్వనున్నారు. పంచాయతీరాజ్‌శాఖ ఆధ్వర్యంలో త్వరలో గ్రామసభలు జరగనున్నాయి. టీకా పంపిణీపై చైతన్యపర్చడానికి కొవిడ్‌-19 ప్రమాణాలను అనుసరించి ఉపాధ్యాయులు, విద్యార్థుల ర్యాలీలు జరగనున్నాయి. టీచర్లకు శిక్షణ కార్యక్రమాలు జరుగుతున్నాయి.

నెలాఖరులోగా శిక్షణ పూర్తి