టీవీ9 సీఈవో రవిప్రకాశ్పై పలు సెక్షన్ల కింద కేసులు నమోదయ్యాయి. సినీ నటుడు శివాజీ, టీవీ9 ఫైనాన్స్ డైరెక్టర్ మూర్తిపైన సైబరాబాద్ సైబర్ క్రైం పోలీసులు కేసు నమోదు చేశారు. వ్యక్తిగత లబ్ధి కోసం టీవీ ఛానల్కు సంబంధించిన పత్రాలను ఫోర్జరీ చేశారనే ఫిర్యాదుతో పోలీసులు కేసు నమోదు చేసి దర్యాప్తు చేపట్టారు. రవిప్రకాశ్, శివాజీ, మూర్తిలను ఇవాళ విచారణకు హాజరుకావాలని సైబరాబాద్ పోలీసులు నోటీసులు జారీ చేశారు.
పలు సెక్షన్ల కింద కేసులు
టీవీ9 ఛానల్ యాజమాన్యంలో తలెత్తిన వివాదాలు పోలీస్ స్టేషన్ మెట్లెక్కాయి. అలంద మీడియా సంస్థ డైరెక్టర్ కౌశిక్ రావు ఫిర్యాదుతో టీవీ9 సీఈవో రవిప్రకాశ్, ఫైనాన్స్ డైరెక్టర్ మూర్తి, సినీ నటుడు శివాజీపై సైబరాబాద్ సైబర్ క్రైం పోలీస్ స్టేషన్లో పలు సెక్షన్ల కింద కేసులు నమోదయ్యాయి. భారతీయ శిక్షాస్మృతిలోని 406, 420, 467, 469, 471, 120(బీ) సెక్షన్లతో పాటు ఐటీ చట్టంలోని 66, 72 సెక్షన్ల కింద కేసు నమోదు చేసి దర్యాప్తు చేస్తున్నట్లు పోలీసులు వెల్లడించారు.
సొంతలబ్ధి కోసం ఛానల్కు సంబంధించి నకిలీ పత్రాలు సృష్టించారని, పోర్జరీ చేశారని గత నెల 24న కౌశిక్ ఫిర్యాదు చేశారు. 30న మరో ఫిర్యాదు చేశారు. ఈ ఫిర్యాదు ఆధారంగా సైబర్ క్రైం పోలీసులు మోసంతో పాటు, ఐటీ చట్టం కింద కేసు నమోదు చేసి... రవిప్రకాశ్, శివాజీ, మూర్తి ఇళ్లతో పాటు టీవీ9 కార్యాలయంలో సోదాలు చేశారు.
రవిప్రకాశ్ ఇంట్లో సోదాలు
జూబ్లీహిల్స్లోని రవిప్రకాశ్ ఇంట్లో పోలీసులు తనిఖీలు నిర్వహించారు. ఆ సమయంలో ఇంట్లో రవిప్రకాశ్ లేకపోవటం వల్ల ఆయన భార్యకు... సీఆర్పీసీ 160 కింద నోటీసులు జారీ చేశారు. వాటిని తీసుకునేందుకు ఆమె నిరాకరించడం వల్ల... పోలీసులు ఇంటికి అంటించారు. హిమాయత్ నగరలోని నటుడు శివాజీ నివాసంతో పాటు ఖైరతాబాద్లోని మూర్తి ఇంట్లోనూ పోలీసులు సోదాలు నిర్వహించారు. అనంతరం వారి కుటంబ సభ్యులకు నోటీసులు అందించారు. ముగ్గురిని కూడా విచారణకు హాజరు కావాల్సిందిగా నోటీసుల్లో పేర్కొన్నారు.
కీలక పత్రాలు స్వాధీనం
టీవీ కార్యాలయం వద్ద గురువారం ఉదయం నుంచి రాత్రి వరకు సోదాలు కొనసాగాయి. రవి ప్రకాశ్ ఛాంబర్తో పాటు... కార్యాలయంలోని ఇతర గదుల్లో పోలీసులు తనిఖీలు నిర్వహించారు. పలు ల్యాప్టాప్లు, హార్డ్డిస్క్లతో పాటు... కొన్ని కీలక పత్రాలను పోలీసులు స్వాధీనం చేసుకున్నారు. వీటిని విశ్లేషించేందుకు ఫోరెన్సిక్‌ ల్యాబ్కు పంపుతామని వెల్లడించారు.
ఇవీ చూడండి : 'సీఈవో పదవి నుంచి నన్ను తొలగించలేదు'
