'ముజఫర్పూర్ అత్యాచార కేసు' దర్యాప్తు తీరుపై సుప్రీంకోర్టు తీవ్ర ఆగ్రహం వ్యక్తం చేసింది. ఈ కేసు దర్యాప్తు చేసిన సీబీఐ మాజీ జాయింట్ డైరెక్టర్ ఏకే శర్మను ఆ సంస్థ బదిలీ చేయడంపై అభ్యంతరం వ్యక్తంచేసింది. అనుమతి లేకుండా దర్యాప్తు అధికారిని బదిలీ చేసి కోర్టు ధిక్కరణకు పాల్పడిన అప్పటి సీబీఐ తాత్కాలిక డైరెక్టర్ నాగేశ్వరరావును ఫిబ్రవరి 12లోగా తమ ముందు విచారణకు హాజరుకావాలని సుప్రీం ధర్మాసనం ఆదేశించింది.
సుప్రీం ప్రధాన న్యాయమూర్తి జస్టిస్ రంజన్ గొగోయ్ నేతృత్వంలోని జస్టిస్ దీపక్ గుప్త, జస్టిస్ సంజీవ్ ఖన్నాలతో కూడిన త్రిసభ్య ధర్మాసనం 'ముజఫర్పూర్ అత్యాచార కేసు'పై విచారణ చేపట్టింది. తమ ఆదేశాలను ధిక్కరించి ఏకేశర్మను బదిలీచేయటంపై ఎవరెవరి పాత్ర ఉందో ఆ అధికారుల వివరాలు తెలపాలని సీబీఐ డైరెక్టర్ రిషికుమార్ శుక్లాను ఆదేశించింది.
కోర్టు ఆదేశాలను ధిక్కరించిన సీబీఐ ఇన్ఛార్జ్ డైరెక్టర్ ఆఫ్ ప్రాసిక్యూషన్ భాసూరామ్నూ ధర్మాసనం ముందు హాజరుకావాలని సుప్రీం తెలిపింది.
ఇంతకు ముందు ముజఫర్పూర్ వసతి గృహంలో బాలికలపై జరిగిన లైంగిక దాడికి సంబంధించిన కేసును బిహార్ నుంచి దిల్లీ సాకేత్ ట్రయల్ కోర్టుకు బదిలీ చేస్తూ సుప్రీం ఆదేశాలు జారీచేసింది. ఈ కోర్టు ఆరు నెలల్లో ఈ కేసు విచారణను ముగించాలని తెలిపింది.
ముజఫర్పూర్ అత్యాచార ఉదంతాన్ని మొట్టమొదటిగా టాటా ఇనిస్టిట్యూట్ ఆఫ్ సోషల్ సైన్స్ నివేదిక బయటపెట్టింది.
