అసోంలో మోదీకి నిరసనల స్వాగతం

ప్రధాని నరేంద్ర మోదీకి గువహటిలో నిరసన సెగ తగిలింది. పౌరసత్వ చట్ట సవరణ బిల్లుకు వ్యతిరేకంగా మోదీ గో బ్యాక్​ అంటూ నినదించారు ఏఏఎస్​యూ సభ్యులు.

రెండు రోజుల పాటు ఈశాన్య రాష్ట్రాల పర్యటన కోసం అసోంలోని గువహటికి చేరుకున్న ప్రధాన మంత్రి నరేంద్ర మోదీకి అఖిల అసోం విద్యార్థి సంఘం(ఏఏఎస్​యూ) సభ్యులు నిరసనతో స్వాగతం పలికారు. పౌరసత్వ హక్కు చట్ట సవరణ బిల్లుకు వ్యతిరేకంగా నినాదాలు చేస్తూ నల్లజెండాలు ఊపారు.

గుహవటిలోని విమానాశ్రయం నుంచి రాజ్​భవన్​కు మోదీ వెళుతున్న సమయంలో విద్యార్థి సంఘం సభ్యులు పెద్దఎత్తున ఆందోళన చేశారు. ప్రధాని వాహనశ్రేణి​ గువహటి విశ్వవిద్యాలయం పరిసరాలకు చేరగానే నిరసనకారులు నినాదాలతో హోరెత్తించారు. మోదీ గోబ్యాక్​, పౌరసత్వ చట్ట సవరణ బిల్లును రద్దు చేయండి అంటూ నినదించారు.