'ఇది మా రాజ్యం, మేం చెప్పిందే వేదం'- గుంటూరు కాంగ్రెస్​ అభ్యర్థిపై వైఎస్సార్సీపీ కార్యకర్తలు దాడి - YSRCP Attack

YSRCP Stopped Congress party Leader Mastanwali Election campaign in Guntur District : గుంటూరు తూర్పు కాంగ్రెస్ అభ్యర్థి మస్తాన్​వలి ఎన్నికల ప్రచారాన్ని వైఎస్సార్సీపీ నేతలు అడ్డుకున్నారు. మస్తాన్​వలి కార్యకర్తలతో కలిసి స్థానిక 50వ డివిజన్ లోని శారదాకాలనీలో ఎన్నికల ప్రచారం నిర్వహించారు. ఈ క్రమంలో 20వ లైనులోని డిప్యూటీ మేయర్ బాలవజ్రబాబు అనుచరులు, వైఎస్సార్సీపీ కార్యకర్తలు కాలనీ వాసుల పేర్లు, ఫోన్ నంబర్లు రాసుకుంటున్నారు. వారి వద్ద చీటీలతోపాటు డబ్బులు కూడా ఉన్నాయి. దీనిని గమనించిన మస్తాన్​వలి వారి వద్దకు వెళ్లి పేర్లు, ఫోన్ నంబర్లు ఎందుకు రాస్తున్నారంటూ ప్రశ్నించారు. దీంతో ఇవన్నీ అడగడానికి మీరెవరంటూ ఆయనతో వైఎస్సార్సీపీ కార్యకర్తలు వాదనకు దిగారు.

ఎన్నికల నిబంధనల ప్రకారం ఓటర్ల డేటా రాయకూడదంటూ మస్తాన్​వలి పేర్కొన్నారు. 'ఇది మా రాజ్యం, మేం చెప్పిందే వేదం' అంటూ మస్తాన్​వలిపైకి వైఎస్సార్సీపీ కార్యకర్తలు దురుసుగా దూసుకొచ్చారు. దీనిని ఎదుర్కొనేందుకు ప్రయత్నించిన కాంగ్రెస్ పార్టీ 50వ డివిజన్ అధ్యక్షుడు భాగ్యరాజుపై దాడి చేసి కొట్టారు. భాగ్యరాజు పోలీసులకు ఫిర్యాదు చేశారు.