అనంత జిల్లాలో రైతుపై ఎలుగుబంట్లు దాడి - తీవ్రగాయాలు - Two Bears Attack On Farmer

Bear Attack On Farmer in Kalyandurgam : అనంతపురం జిల్లా కళ్యాణదుర్గం మండలం  ఉప్పువంక గ్రామంలో రైతుపై రెండు ఎలుగుబంట్లు దాడి చేశాయి. ఎలుగుబంట్ల దాడిలో రామన్న అనే రైతు తీవ్రంగా గాయపడ్డాడు. బుధవారం తెల్లవారుజామున వ్యవసాయ పనులకు వెళుతున్న రామన్నపై ఎలుగుబంట్లు దాడి చేశాయి. గాయపడిన రైతును కళ్యాణదుర్గం ప్రభుత్వాస్పత్రికి తరలించారు. గత కొద్ది రోజులుగా రాత్రి వేళ ఎలుగుబంట్లు జనావాసాల్లోకి వస్తున్నాయని ప్రజలు వాపోతున్నారు. ఇటీవల ఎలుగుబంటి బిస్కెట్​ ఏజెన్సీలోకి చొరబడి కలకలం సృష్టించిన సంగతి తెలిసిందే. ఈ ఘటన అంతా అక్కడే ఉన్న సీసీ కెమెరాల్లో రికార్డయ్యింది.

ఇటీవల శ్రీకాకుళం జిల్లాలో ఎలుగుబంటి దాడి ప్రజలను ఉలిక్కిపడేలా చేసింది. జనావాసాలకు అతి సమీపంలోనే సంచరిస్తున్న ఎలుగుబంటి ముగ్గురిపై దాడికి పాల్పడింది. ఈ ఘటనలో ఇద్దరు మృతి చెందారు. ఒకరు తీవ్రంగా గాయపడ్డారు. సమాచారం అందుకున్న అటవీ శాఖ అధికారులు ఘటనాస్థలికి చేరుకుని ఎలుగుబంటిని బంధించారు. అయితే జనావాసాల్లోకి ఎలుగుబంట్లు చొరబడటం సర్వసాధారణమైపోయింది. దీంతో ప్రజలు బయటికెళ్లాలంటే భయపడుతున్నారు.