జగన్ అమానవీయ రాజకీయ అంతానికి రోజులు దగ్గరపడ్డాయి- చంద్రబాబు - Chandrababu Calls for Prajagalam

TDP Chief Chandrababu Calls for Prajagalam: నిరుపేదలన్న కనికరం లేకుండా, వృద్ధులన్న జాలి లేకుండా పింఛన్లు ఇవ్వడానికి మండుటెండలో పండుటాకులను సీఎం జగన్ హింసిస్తున్నాడని తెలుగుదేశం అధినేత చంద్రబాబు ఆగ్రహం వ్యక్తం చేశారు. జగన్ ప్రభుత్వం చేస్తున్న అమానవీయ రాజకీయం అంతానికి రోజులు దగ్గరపడ్డాయి అని హెచ్చరించారు. పశ్చిమగోదావరి జిల్లాలో ఇవాళ జరుగుతున్న నరసాపురం, పాలకొల్లు ప్రజాగళం సభలకు ప్రజలు తరలిరావాలని పిలుపునిచ్చారు.

కాగా వైసీపీ డీఎన్‌ఏలోనే శవరాజకీయం ఉందని చంద్రబాబు విమర్శించారు. రక్తంలో మునిగిపోయిన వైసీపీకి ఓట్లు వేయొద్దని ప్రజలను కోరారు. గురువారం తూర్పుగోదావరి జిల్లా కొవ్వూరులో నిర్వహించిన ప్రజాగళం సభలో పాల్గొన్న ఆయన ఈ మేరకు వ్యాఖ్యానించారు. ఈ క్రమంలో జగన్‌ విధ్వంస పాలకుడిగా రాష్ట్రాన్ని సర్వనాశనం చేశారని, ప్రజల భవిష్యత్తును అంధకారం చేసి, పిల్లల భవిష్యత్తును ప్రశ్నార్థకం చేశారని మండిపడ్డారు. వైసీపీ అరాచక పాలన నుంచి రాష్ట్రాన్ని కాపాడుకోవటం కోసమే బీజేపీతో జట్టు కట్టామని స్పష్టం చేశారు.