ఆరు వేలకు బదులు 1.17కోట్ల ఫైన్ - ఆర్టీఏ అధికారి నిర్వాకం

అధికారి అత్యుత్సాహంతో వాహనదారుడిపై ఓవర్‌ లోడ్‌ కేసు నమోదు - ఆన్‌లైన్‌లో 3 టన్నులుకు బదులు 3వేల టన్నులు నమోదు చేసిన అధికారి

Vehicle Owner Got Rs. 1.17 Crore Fine in Eluru District : రవాణాశాఖలో పనిచేస్తున్న ఓ సీనియర్ వాహన తనిఖీ అధికారి చేసిన నిర్వాకంతో ఓ వాహన యజమానికి ఆన్‌లైన్‌లో ఏకంగా రూ.1.17 కోట్లు జరిమానా పడింది. కోటిన్నరకు పైగా జరిమానా విధించడంతో ఆ వాహనదారుడు లబోదిబోమంటున్నారు. ఈ ఘటన ఏలూరు జిల్లాలో జరిగింది. ఏలూరులో పనిచేస్తున్న ఓ సీనియర్ వాహన తనిఖీ అధికారి ఈనెల 21న ఏలూరు సమీపంలోని జాతీయ రహదారిపై వాహనాలు తనిఖీలు చేస్తున్నారు. నెల్లూరు నుంచి కైకలూరు చేపపిల్లల లోడుతో వెళ్తున్న బొలెరో వాహనంపై ఓవర్‌ లోడ్‌ కేసు నమోదు చేశారు.

కానీ ఆ వాహన తనిఖీ అధికారి తనిఖీ చేస్తున్న సమయంలో మూడు టన్నులు అదనంగా మాత్రమే ఆ వాహనం ఓవర్ లోడ్‌తో వెళ్తుంది. అదనపు ఓవర్ లోడ్​కు టన్నుకు 2 వేల చొప్పున జరిమానా విధించాల్సి ఉండగా అధికారి అత్యుత్సాహంతో 3 వేల టన్నులను ఆన్లైన్లో నమోదు చేశారు. దీంతో రూ.1.17 కోట్లు జరిమానా ఆన్‌లైన్‌లో విధించారు. ఈ భారీ జరిమానా చూసిన వాహన యజమాని కంగుతిన్నాడు.

వెంటనే ఏలూరులోని రవాణాశాఖ ఉన్నతాధికారులను తమ సమస్య గురించి తెలియజేశాడు. సంబంధిత అధికారులు సాంకేతిక సమస్య సాకు చూపుతూ దిద్దుబాటు చర్యలు చేపట్టారు. గతంలో కూడా సదరు అధికారి ఇలాంటి వ్యవహారాల్లో చిక్కుకోవడంతో రెండున్నరేళ్లపాటు పోస్టింగ్ ఇవ్వలేదు. వాహనదారుడికి సంబంధించి ఆన్‌లైన్‌లో జరిమాన సరిచేసి సమస్యను పరిష్కరించామన్నారు.