'మమ్మల్ని బస్సెక్కించి - నువ్వు పాడెక్కావా భాస్కరా'

భార్య సీమంతం అనంతరం తిరిగి వెళ్తుండగా ప్రమాదం

Road Accident in Anantapur District : మమ్మల్ని బస్సెక్కించి బైకుపై వస్తానంటూ పాడెక్కావా భాస్కరా అంటూ కుటుంబ సభ్యుల రోదన స్థానికులకు సైతం కంటతడి పెట్టించింది. ఈ హృదయవిదారక సంఘటన సత్యసాయి జిల్లాలో చోటుచేసుకుంది. కదిరి మండలం పట్నం వద్ద జాతీయ రహదారి 42పై లారీ - బైక్​ ఢీ కొన్న ప్రమాదంలో భాస్కర్‌ (24) అనే వ్యక్తి మృతి చెందారు.

సీమంతం వేడుకలో ఆనందంగా : కదిరి మండలం పట్నం గ్రామానికి చెందిన భాస్కర్‌ ఉపాధి కోసం అనంతపురం వెళ్లారు. కొంతకాలం నుంచి అక్కడే కుటుంబంతో కలిసి నివాసం ఉంటున్నారు. పాల వ్యాను డ్రైవర్‌గా పనిచేసే అతను భార్య సీమంతం కోసం స్వగ్రామమైన పట్నానికి శనివారం (అక్టోబర్​ 12న) వచ్చారు. ఆదివారం బంధువులు, మిత్రులతో కలిసి సీమంతం వేడుకలో ఆనందంగా గడిపాడు. భార్య, కుటుంబ సభ్యులతో విందులో సంతోషంగా పాల్గొన్నాడు. ఈ క్రమంలోనే సాయంత్రం తాను బైక్​పై వస్తానని తల్లిదండ్రులు, భార్య లక్ష్మిని సోమవారం ఉదయం అనంతపురం బస్సు ఎక్కించారు.

బయలుదేరిన నిమిషాల వ్యవధిలోనే : భాస్కర్​ సొంతూరులో పనులు ముగించుకుని బైక్​పై అనంతపురానికి బయలుదేరారు. ఇంతలోనే హంద్రీనీవాకాలువ మోరీ వద్ద లారీ ఢీ కొట్టింది. దీంతో అతడు తీవ్రంగా గాయపడి అక్కడికక్కడే మృతి చెందాడు. స్థానికుల ద్వారా విషయం తెలుసుకున్న పోలీసులు సంఘటన స్థలానికి చేరుకొని అతన్ని కదిరి ఆసుపత్రికి తరలించారు. ఈ నేపథ్యంలో పోలీసులు కుటుంబ సభ్యులకు సమాచారం అందించారు. దీంతో వారు హుటాహుటిన కదిరి ఆసుపత్రికి చేరుకున్నారు.

గుండెలు పగిలేలా రోదన : భార్య సీమంతం కార్యక్రమంలో కుటుంబసభ్యులు, బంధువులతో ఆనందంగా గడిపిన భాస్కర్ చనిపోవడంతో ఆ ఇంట విషాద ఛాయలు అలుముకున్నాయి. చేతికి వచ్చిన కుమారుడు, తన భర్త ఇకలేడని తెలుసుకున్న భార్య లక్ష్మి గుండెలు పగిలేలా రోదించారు. ఈ సంఘటన సైతం కంటతడి పెట్టింది. మృతుడి కుటుంబ సభ్యుల ఫిర్యాదు మేరకు కేసు నమోదు చేసుకొని దర్యాప్తు చేస్తున్నామని కదిరి సీఐ మోహన్​ తెలిపారు.