మరో 6 గంటల్లో తుపాను - రాయలసీమలో భారీ వర్షాలు

నైరుతి బంగాళాఖాతంలో తీవ్రవాయుగుండం - మరికొద్ది గంటల్లో తుపానుగా మారే అవకాశం

AP Rain Alert : నైరుతి బంగాళాఖాతంలో ఏర్పడిన తీవ్ర వాయుగుండం మరికొద్ది గంటల్లో తుపానుగా మారే అవకాశం ఉందని వాతావరణ కేంద్రం అధికారులు తెలిపారు. ఇది తమిళనాడులోని కారైకాల్ వద్ద తీరం దాటితోందని అంచనా వేస్తున్నారు. దీని ప్రభావంతో దక్షిణ కోస్తాంధ్ర జిల్లాల్లో మోస్తారు నుంచి భారీ వర్షాలు కురుస్తాయని అధికారులు హెచ్చరించారు. నెల్లూరు, చిత్తూరు, తిరుపతి, అన్నమయ్య జిల్లాల్లో రేపు భారీ వర్షాలు కురిసే అవకాశం ఉందన్నారు. దక్షిణ కోస్తాలో గంటకు 55 నుంచి 75 కిలోమీటర్ల వేగంతో ఈదురుగాలులు వీస్తాయని తెలిపారు. కృష్ణపట్నం, నిజాంపట్నం వద్ద మూడో నెంబర్‌ ప్రమాద హెచ్చరిక జారీ చేశారు. మిగిలిన పోర్టుల్లో ఒకటో నెంబర్‌ ప్రమాద హెచ్చరిక కొనసాగుతోంది.

గంటకు 90 కిలోమీటర్ల వేగంతో ఈదురుగాలు: ఈ వాయుగుండం గత 6 గంటల్లో గంటకు 8 కిలోమీటర్ల వేగంతో ఉత్తర వాయవ్య దిశగా కదులుతూ శుక్రవారం అదే ప్రాంతంలో కేంద్రీకృతమై ఉందని వాతావరణ శాఖ అధికారులు చెప్పారు. ఇది శ్రీలంకలోని ట్రికోమలీకి ఉత్తర ఈశాన్యముగా 270, నాగపట్టణానికి తూర్పుగా 300, పుదుచ్చేరికి తూర్పు ఆగ్నేయంగా 340, చెన్నైకి ఆగ్నేయంగా 380 కిలోమీటర్ల దూరంలో ఉందన్నారు. ఇది వాయువ్య దిశగా కదిలి, బలపడి రానున్న 6 గంటల్లో తుపానుగా మారె అవకాశం ఉందని తెలిపారు.

ఆ తర్వాత ఇది వాయువ్య దిశగా ప్రయాణాన్ని కొనసాగించి నవంబర్ 30 వ తేదీ మధ్యాహ్నం సమయంలో ఉత్తర తమిళనాడు-పుదుచ్చేరి దగ్గర, కారైకాల్,మహాబలిపురం తీరాల మధ్య, పుదుచ్చేరికి సమీపంలో తీరం దాటుతుంది. ఈ తుఫాను తీరం దాటే సమయంలో గంటకు 90 కిలోమీటర్ల వేగంతో ఈదురు గాలులు వీచే అవకాశం ఉందని, ప్రజలు అప్రమత్తంగా ఉండాలని, అన్నదాతలు తగిన జాగ్రత్తలు తీసుకోవాలని వాతావరణ అధికారులు సూచనలు చేస్తున్నారు.

ఫంగన్‌ తుపాను సమాచారాన్ని చేరవేస్తున్న ఉపగ్రహాలు : నెల్లూరు జిల్లాలో ఆకస్మిక వరదలు రావొచ్చని వాతావరణ శాఖ హెచ్చరికలు జారీ చేసింది. మత్స్యకారులు సముద్రంలో వేటకు వెళ్ల వద్దని విపత్తుల నిర్వహణ సంస్థ ఎండీ కూర్మనాథ్‌ తెలిపారు. మరో పక్క, బంగాళాఖాతంలో ఏర్పడిన అల్పపీడన ద్రోణి ప్రభావంపై భారత అంతరిక్ష పరిశోధన సంస్థ (ISRO) రాష్ట్ర ప్రభుత్వానికి నిరంతరం సంకేతాలు ఇస్తోంది. ఈవోఎస్‌-06, ఇన్సాట్‌-3డీఆర్‌ ఉపగ్రహాలు ఫంగన్‌ తుపాను సమాచారాన్ని చేరవేస్తున్నాయి.