'రూ.5 లక్షలు లంచమివ్వలేదని పరిహారాన్ని అడ్డుకున్నారు'

వైఎస్సార్స్​సీపీ ప్రభుత్వంలో తీవ్రంగా నష్టపోయాం మీరే ఆదుకోవాలి - మంగళగిరిలోని టీడీపీ కేంద్ర కార్యాలయంలో టీడీపీ నేతలకు బాధితులు ఫిర్యాదు

People Complain to TDP Leaders in Mangalagiri Party Office: జాతీయ రహదారి నిర్మాణంలో ఇళ్లు, దుకాణాలు కోల్పోయిన తమకు న్యాయం చేయాలంటే రూ.5 లక్షలు లంచం ఇవ్వాలని గత ప్రభుత్వంలోని వైఎస్సార్​సీపీ నేతలు డిమాండ్​ చేశారని తిరుపతి జిల్లాలోని రేణిగుంట మండలం కరకంబాడి బీసీ కాలనీకి చెందిన పలువురు బాధితులు ఆవేదన వ్యక్తం చేశారు. ఈ క్రమంలో తమకు న్యాయం చేయాలని కోరుతూ మంగళగిరిలోని టీడీపీ కేంద్ర కార్యాలయంలో ఫిర్యాదు చేశారు. గతంలో కడప- రేణిగుంట జాతీయ రహదారి నిర్మాణంలో ఇళ్లు, స్థలాలు కోల్పోయామని వాపోయారు.

దీని గురించి అప్పటి శ్రీకాళహస్తి ఎమ్మెల్యే బియ్యం మధుసూదన్‌రెడ్డిని సంప్రదించగా రేణిగుంట వైఎస్సార్​సీపీ నాయకుడిని మా దగ్గరకు పంపి న్యాయం జరగాలంటే ఒక్కొక్కరూ రూ.5 లక్షల చొప్పున లంచం ఇవ్వాలని అతడు డిమాండు చేశాడని బాధితులు తెలిపారు. దానికి వారు అంగీకరించకపోవడంతో పరిహారం రాకుండా అడ్డుకున్నారని బాధితులు వాపోయారు.

ఇలా ఎంతో మంది వైఎస్సార్​సీపీ ప్రభుత్వ హయాంలో ఎదుర్కొన్న ఇబ్బందులను టీడీపీ కార్యాలయంలో జరిగిన 'ప్రజావేదిక'లో ఫిర్యాదు చేశారు. వైఎస్సార్​సీపీ నాయకులు రహదారిని ఆక్రమించి రాకపోకలకు ఇబ్బంది కలిగిస్తున్నారని తిరుపతి నగరం ఐదో వార్డుకు చెందిన వి.రాధ టీడీపీ నేతల దృష్టికి తెచ్చారు. దీనిపై అధికారులకు ఫిర్యాదు చేసినా ఎలాంటి చర్యలు తీసుకోవడం లేదని వాపోయారు.

ఎన్నో ఏళ్లుగా టీడీపీ కోసం పనిచేస్తున్న తమను కాదని సీసీ రహదారుల నిర్మాణ కాంట్రాక్టులను వైఎస్సార్​సీపీ వాళ్లకు కట్టబెడుతున్నారని సత్యవేడు నియోజకవర్గ ఎమ్మెల్యేపై పిచ్చాటూరు మండల టీడీపీ అధ్యక్షుడు తిరుమలైరెడ్డి ఫిర్యాదు చేశారు. పోలవరం నిర్మాణంలో ఇళ్లు కోల్పోయిన తనకు ఆర్‌ అండ్‌ ఆర్‌ ప్యాకేజీ కింద నివాస స్థలం ఇప్పించాలని ఏలూరు జిల్లా పోలవరం మండలం కొరుటూరుకు చెందిన తిప్పర్తి నాగేశ్వరరావు వేడుకున్నారు. రుణం ఇప్పిస్తానని కాకినాడ జిల్లా పారిశ్రామిక శాఖ కార్యాలయంలో ఓ ఉన్నత ఉద్యోగి తమ నుంచి 19 లక్షలు వసూలు చేశాడని పలువురు బాధితులు ఫిర్యాదు చేశారు.

సమస్య పరిష్కరించాలని ఆదేశాలు: బాధితల నుంచి నుంచి వేమూరు ఎమ్మెల్యే నక్కా ఆనంద్‌బాబు, ఎస్‌ఈఈడీఏపీ ఛైర్మన్‌ దీపక్‌రెడ్డి, తెలుగు రైతు రాష్ట్ర అధ్యక్షుడు మర్రెడ్డి శ్రీనివాసరెడ్డి ఫిర్యాదులు స్వీకరించారు. సంబంధిత అధికారులతో మాట్లాడి సమస్య పరిష్కరించాలని ఆదేశించారు.