అధికార లాంఛనాలతో రామ్మూర్తినాయుడి అంత్యక్రియలు పూర్తి

నారావారిపల్లెలో నారా రామ్మూర్తినాయుడి అంత్యక్రియలు - అంత్యక్రియల్లో పాల్గొన్న చంద్రబాబు, లోకేశ్, కుటుంబసభ్యులు

Nara Rammurthy Naidu Last Rites: తిరుపతి జిల్లా నారావారిపల్లెలో నారా రామ్మూర్తినాయుడి అంత్యక్రియలు పూర్తయ్యాయి. మధ్యాహ్నం 3 గంటల తర్వాత స్వగ్రామం నారావారిపల్లెలో రామ్మూర్తి నాయుడు అంత్యక్రియలు జరిగాయి. ప్రభుత్వ అధికార లాంఛనాలతో తల్లిదండ్రులు అమ్మణ్నమ్మ, ఖర్జూర నాయుడు సమాధుల పక్కనే రామ్మూర్తి అంతిమ సంస్కారాలు నిర్వహించారు. అంత్యక్రియల్లో రామ్మూర్తి నాయుడు సోదరుడు, ముఖ్యమంత్రి చంద్రబాబుతో పాటు మంత్రి నారా లోకేశ్ కుటుంబసభ్యులు పాల్గొన్నారు. తండ్రి రామ్మూర్తినాయుడు చితికి నారా రోహిత్‌ నిప్పు పెట్టారు.

అంతకుముందు రామ్మూర్తి భౌతిక కాయానికి మహారాష్ట్ర గవర్నర్ రాధాకృష్ణన్, ముఖ్యమంత్రి చంద్రబాబు, భువనేశ్వరి, లోకేశ్, బ్రహ్మణి, దేవాన్ష్‌ నివాళులు అర్పించారు. ముఖ్యమంత్రి చంద్రబాబు హైదరాబాద్‌ నుంచి రేణిగుంట విమానాశ్రయానికి వచ్చి, అక్కడి నుంచి రోడ్డు మార్గంలో నారావారిపల్లెకు చేరుకున్నారు. సోదరుడి మృతదేహంపై పుష్పగుచ్చం ఉంచి అంజలి ఘటించారు. సోదరుడి కుమారులు రోహిత్, గిరీష్‌ను ఓదార్చారు.

టీడీపీ ప్రజాప్రతినిధులు, నాయకులు, కార్యకర్తలు రామ్మూర్తి పార్థివదేహానికి నివాళులు అర్పించారు. సినీ నటుడు మోహన్ బాబు, మంచు మనోజ్, సినీ నిర్మాత ఎన్​వీ ప్రసాద్ తదితరులు రామ్మూర్తి భౌతికకాయానికి అంజలి ఘటించారు. రామ్మూర్తి కుటుంబసభ్యులను పరామర్శించారు. కొంత కాలంగా అనారోగ్యంగా బాధ పడుతున్న రామ్మూర్తి నాయుడు హైదరాబాద్‌ ఆసుపత్రిలో చికిత్స పొందుతూ శనివారం కన్నుమూశారు. అక్కడి నుంచి రామ్మూర్తి మృతదేహాన్ని స్వగ్రామం నారావారిపల్లెకు తరలించారు.

Ramamurthy Naidu Passed Away : నారా రామ్మూర్తినాయుడు 1952లో నారా ఖర్జూరనాయుడు, అమ్మణ్ణమ్మ దంపతులకు జన్మించారు. ముఖ్యమంత్రి చంద్రబాబు నాయుడు రామ్మూర్తి సోదరుడు. నారా రామ్మూర్తి నాయుడు ఎస్వీ ఆర్ట్స్‌ డిగ్రీ కళాశాలలో డిగ్రీ బీఏ చేశారు. 1992 నుంచి ప్రత్యక్ష రాజకీయాల్లో క్రియాశీలక పాత్ర పోషించిన రామ్మూర్తి, 1994లో టీడీపీ తరఫున చంద్రగిరి నుంచి పోటీ చేసి విజయం సాధించారు. 1999 అసెంబ్లీ ఎన్నికల్లో ఓటమి చెందిన తరువాత రాజకీయంగా ఇబ్బందులు ఎదుర్కొన్నారు.

2003లో అప్పటి కాంగ్రెస్‌ అధినేత్రి సోనియాగాంధీ సమక్షంలో దిల్లీలో రామ్మూర్తినాయుడు ఆ పార్టీలో చేరారు. కాంగ్రెస్‌ అధిష్టానం 2004లో శ్రీకాళహస్తి నుంచి పోటీ చేయాలని ఆదేశించడంతో ఆయన విభేదించారు. అనంతరం చంద్రగిరి నుంచి స్వతంత్ర అభ్యర్థిగా పోటీ చేసి ఓటమి పాలయ్యారు. తర్వాత రామ్మూర్తి నాయుడికి అనారోగ్య సమస్యలు తలెత్తాయి.