వరద సహాయక చర్యలపై లోకేశ్ సమీక్ష - బాధితులకు అందుతున్న సాయంపై ఆరా - Lokesh Review Flood Relief

Lokesh Review Flood Relief : రాష్ట్రంలో వరద సహాయక చర్యలపై మంత్రి లోకేశ్ నిరంతరం సమీక్ష చేస్తున్నారు. బాధితులకు అందుతున్న సాయంపై ఆరా తీస్తున్నారు. ఈ క్రమంలోనే వివిధ శాఖల మంత్రులు, అధికారులకు పలు సూచనలు, సలహాలు చేస్తున్నారు.

Flood Relief Operations in AP : ఏపీలో వరద సహాయక చర్యలపై వివిధ శాఖల మంత్రులు, అధికారులతో మంత్రి నారా లోకేశ్​ సమన్వయం చేస్తున్నారు. ఉదయం నుంచి ఆయన పర్యవేక్షణలో విజయవాడ బాధితులకు ముమ్మరంగా సహాయ కార్యక్రమాలు కొనసాగుతున్నాయి. బాధితుల కోసం రాష్ట్రం నలుమూలల నుంచి వివిధ సంస్థలు ఆహారాన్ని పంపిస్తున్నట్లు లోకేశ్ తెలిపారు. సోమవారంతో పోల్చితే ఈరోజు ఉదయానికి ప్రకాశం బ్యారేజీ వద్ద 2 లక్షల క్యూసెక్కుల పైగా వరద తగ్గుముఖం పట్టిందని వివరించారు.

Vijayawada Floods 2024 : బాధితుల కోసం ఐదు హెలికాప్టర్లు, 174 బోట్లు, డ్రోన్లు పనిచేస్తున్నాయని లోకేశ్ తెలిపారు. వాటి ద్వారా ఎన్డీఆర్ఎఫ్, ఎస్డీఆర్ఎఫ్ బృందాలు వారికి ఆహార పదార్థాల సరఫరా చేస్తున్నారని చెప్పారు. భారీ వర్షాలు, వరదల కారణంగా రాష్ట్రంలో 2,000ల కిలోమీటర్ల ఆర్అండ్​బీ రోడ్లు దెబ్బతిన్నాయని, 25 చోట్ల రహదారులకు కోతలు ఏర్పాడ్డాయన్నారు. అదేవిధంగా 1,80,244 హెక్టార్లలో పంట నష్టం జరిగిందని వెల్లడించారు. మరోవైపు 43,417 మంది నిరాశ్రయులు అయ్యారని పేర్కొన్నారు. వారిని పునరావాస కేంద్రాలకు తరలించి కావల్సిన సౌకర్యాలను అందిస్తున్నట్లు లోకేశ్ వివరించారు.