Kavach Installation in AP : ఏపీలోని 3 కీలక రైలు మార్గాల్లో ప్రమాదాలు జరగకుండా నివారించేందుకు కవచ్ వ్యవస్థ ఏర్పాటు చేస్తున్నారు. రెడ్ సిగ్నల్‌ను పట్టించుకోకుండా లోకో పైలెట్‌ రైలును ముందుకు నడిపితే, ఈ వ్యవస్థ అప్రమత్తం చేసి, బ్రేక్‌లను తన నియంత్రణలోకి తెచ్చుకొని ప్రమాదాలను నియంత్రిస్తుంది. ఇలాంటి కీలకమైన కవచ్ వ్యవస్థ దువ్వాడ-విజయవాడ, విజయవాడ-గూడూరు, మంత్రాలయంరోడ్‌-రేణిగుంట మార్గాల్లో అందుబాటులోకి రానుంది. అలాగే ఓ రైలు ఒక స్టేషన్‌ నుంచి బయలుదేరాక మరో స్టేషన్‌కు చేరే వరకు ఆ మార్గంలో ఇంకో రైలును పంపేందుకు అవకాశం ఉండదు. దీని వల్ల రైళ్ల నిరీక్షణ పెరిగిపోతోంది. దీనికి అడ్డుకట్టవేస్తూ ఆటోమేటిక్ బ్లాక్‌ సిగ్నలింగ్‌ విధానాన్ని సైతం ఈ 3 మార్గాల్లో అందుబాటులోకి తీసుకొస్తున్నారు. కవచ్, ఆటోమేటిక్ బ్లాక్‌ సిగ్నలింగ్‌లకు కలిపి రైల్వే శాఖ 2,104 కోట్ల రూపాయలు కేటాయించింది.
ఎలక్ట్రానిక్, రేడియో ఫ్రీక్వెన్సీని గుర్తించే పరికరాలు : కవచ్ ద్వారా రైళ్లు సురక్షితంగా ప్రయాణించేందుకు వీలు ఉంటుంది. ఈ వ్యవస్థలో ఎలక్ట్రానిక్, రేడియో ఫ్రీక్వెన్సీని గుర్తించే పరికరాలు ఉంటాయి. రైలు ఇంజిన్లలో, సిగ్నలింగ్‌ వ్యవస్థ, పట్టాలు, ప్రతి రైల్వే స్టేషన్‌లో వీటిని ఏర్పాటు చేస్తారు. ఇదంతా జీపీఎస్‌తో అనుసంధానమై పని చేస్తుంది. లోకో పైలెట్‌ రెడ్ సిగ్నల్ వద్ద ఆగకుండా ముందుకు వెళితే, కవచ్ వ్యవస్థ అప్రమత్తం అవుతుంది. బ్రేక్‌లను తన నియంత్రణలోకి తెచ్చుకుంటుంది. అదే లైన్‌లో రైలు వస్తున్నట్లు తెలిస్తే వెంటనే రైలుని ఆపేస్తుంది.
"అన్ని రైళ్లలో 'కవచ్ వ్యవస్థ' ఏర్పాటు చేస్తాం" - అశ్వినీ వైష్ణవ్
దీనిని దువ్వాడ-విజయవాడ మధ్య 332 కి.మీ. మేర ఏర్పాటు చేస్తున్నారు. బల్హార్షా-విజయవాడ-గూడూరు మార్గంలో 742 కి.మీ. మేర దీనిని అమర్చే పనులు మొదలు అయ్యాయి. ఇందులో రాష్ట్ర పరిధిలోని 325 కి.మీ. ఉంది. వాడి-గుంతకల్లు-రేణిగుంట మార్గంలో 538 కి.మీ.లో కవచ్ మంజూరుకాగా, ఇందులో మన రాష్ట్ర పరిధిలోని 402 కి.మీ. ఉంది.
ఆటో మేటిక్‌గా రైలుకు సిగ్నల్ : ప్రస్తుతం ఏపీ ఇంటర్మీడియట్‌ బ్లాక్‌ (IB) సిగ్నలింగ్‌ విధానం ఉంది. అంటే ఓ రైలు మొదటి స్టేషన్‌లోని డిస్పాచ్‌ సిగ్నల్ దాటి బయలు దేరి, తర్వాత స్టేషన్‌లోని హోం సిగ్నల్‌లోకి చేరుకునే వరకు అదే లైనులో వెనుక మరొక రైలును పంపరు. ఇలా 2 స్టేషన్ల మధ్య దూరం ఎక్కువ ఉంటే వెనుక స్టేషన్‌లో రైళ్లు ఆగిపోవాల్సి ఉంటోంది.
ఉదాహరణకు విజయవాడ సమీపంలోని గుణదల-ముస్తాబాద్‌ మధ్య 7 కి.మీ.కాగా, ఓ రైలు గుణదలలో బయలుదేరి ముస్తాబాద్‌ చేరుకునే వరకు వెనుక వచ్చే రైలుకు గుణదలలో గ్రీన్‌ సిగ్నల్ లభించదు. ఇటువంటి ఇంటర్మీడియట్‌ బ్లాక్‌ సిగ్నలింగ్‌ స్థానంలో ఆటోమేటిక్ బ్లాక్‌ సిగ్నలింగ్‌ విధానం తీసుకొస్తున్నారు. 2 స్టేషన్ల మధ్య దూరాన్ని బ్లాక్‌లుగా విభజించడంతో, ఆ బ్లాక్‌ దాటగానే ఆటో మేటిక్‌గా వెనుక మరొక రైలుకు సిగ్నల్ లభిస్తుంది.
ఉదాహరణకు గుణదల-ముస్తాబాద్‌ మధ్య 7 కి.మీ.దూరంలో నాలుగు బ్లాక్‌లు ఏర్పాటు చేశారు. దీని వల్ల గుణదలలో బయలుదేరి రైలు ముస్తాబాద్‌ చేరుకునేలోపు వెనుక మరో 4 రైళ్లను పంపేందుకు వీలుంటుంది. దువ్వాడ-విజయవాడ మార్గంలో ఇప్పటికే విజయవాడ-నూజివీడు, నిడదవోలు-కడియం, నర్సింగపల్లి-తాడి స్టేషన్ల మధ్య ఆటోమెటిక్‌ బ్లాక్‌ సిగ్నలింగ్‌ విధానం అందుబాటులోకి వచ్చింది. మిగిలిన భాగంలో కూడా దీనిని ఏర్పాటు చేయనున్నారు.
2026-2027 ఆర్థిక సంవత్సరం నాటికి పూర్తి : కవచ్ ఏర్పాటు, ఆటోమెటిక్‌ బ్లాక్‌ సిగ్నలింగ్‌ పనులన్నీ 2026-2027 ఆర్థిక సంవత్సరం నాటికి పూర్తి చేయాలని రైల్వేశాఖ లక్ష్యంగా పెట్టుకుంది.
వందేభారత్‌కు 'కవచ్'- 160 కి.మీ స్పీడ్కు బ్రేకులు- ట్రయల్ సక్సెస్
