Murthy Yadav Allegations on CS Jawahar Reddy : ఉత్తరాంధ్రలో 2 వేల కోట్ల రూపాయల విలువైన అసైన్డ్ భూములు సీఎస్ జవహర్ రెడ్డి కొట్టేశారని జనసేన కార్పొరేటన్‌ పీతల మూర్తియాదవ్‌ ఆరోపించారు. జవహర్‌రెడ్డి సీఎస్ అయ్యాకే భూముల మార్పిడి జీవో 596 ఇచ్చారన్న ఆయన 800 ఎకరాలకు పైగా భూములకు డీల్‌ జరిగిందని తెలిపారు. ఎన్నికల హింసపై పర్యవేక్షించకుండా సీఎస్ విశాఖలో భూవ్యవహారాలు చక్కబెట్టుకుంటున్నారని మూర్తియాదవ్‌ మండిపడ్డారు.
CS Jawahar Reddy Encroaching Assigned Lands in Visakhapatnam? : 4 రోజుల క్రితం రిజిస్ట్రేషన్లకు వచ్చి భోగాపురం ఎయిర్‌పోర్టుపై సమీక్షించారని పీతల మూర్తి యాదవ్‌ తెలిపారు. నెల రోజుల్లో పదవీ విరమణ చేయనుండగా భారీగా భూఅక్రమాలకు తెరలేపారని, 400 ఎకరాల ఎస్సీ, బీసీల అసైన్డ్ భూములను బినామీల పేరిట చేజిక్కించుకున్నారని, భోగాపురం విమానాశ్రయం చుట్టూ వందల ఎకరాలపై జవహర్‌రెడ్డి కన్నేశారని ఆరోపించారు. విశాఖ, విజయనగరం జిల్లా భూములపై సీఎస్ కన్నేసి కుమారుడిని రంగంలోకి దింపారని అన్నారు.
ఎకరం రూ.2 కోట్లు పలికే భూములకు ఐదారు లక్షలకే ఒప్పందాలు కుదర్చుకున్నారని నిప్పులు చెరిగారు. వైఎస్సార్సీపీ ప్రభుత్వం మళ్లీ రాదన్న భయంతో హడావిడిగా రిజిస్ట్రేషన్లకు సిద్ధం చేసుకున్నారని తెలిపారు. ఈసీ జోక్యం చేసుకుని అక్రమ భూరిజిస్ట్రేషన్లు నిలిపివేయాలని, రాష్ట్ర వ్యాప్తంగా మార్చి నుంచి జరిగిన రిజిస్ట్రేషన్లు రద్దు చేయాలని కోరారు. అసైన్డ్ భూములు కొట్టేసిన వైఎస్సార్సీపీ నేతలు, ఐఏఎస్‌లపై సీబీఐ విచారించాలని డిమాండ్ చేశారు.
