నిషేధం నిల్లు ఆదాయం ఫుల్లు - ఐదేళ్లలో రూ.లక్షా 55 వేల కోట్ల అమ్మకాలు - Prohibition of Alcohol

Jagan Cheated People by Falsely Promising to Ban Alcohol: నిషేధం అంటే కనిపించనీయకుండా చేయడం. కానీ జగనన్న మద్యపాన నిషేధానికి అర్థమే మార్చేశారు. ఊళ్లలో బెల్టుషాపులు కొత్తగా బార్లు, వాకిన్‌ స్టోర్లు ఇలా కొత్తకొత్త పోకడలతో జనానికి తాగించారు. ఊగించారు. దశలవారీ నిషేధం అని చెప్పి పెగ్గులవారీగా ఆదాయన్ని పెంచుకుంటూపోయారు. బీద, బిక్కి బలహీనతల్ని సొమ్ముచేసుకుని గల్లాపెట్టె నింపుకొన్నారు. ఏకంగా లక్షా 54 వేలకోట్ల రూపాయల విలువైన జే-బ్రాండ్‌ మద్యాన్ని డొక్కలెండిన బక్కజీవుల గొంతుల్లో పోశారు.

Jagan Cheated People by Falsely Promising to Ban Alcohol: ఒక్క మద్యం దుకాణం కూడా‌ కనిపించదని ప్రతిపక్ష నేతగా జగన్ ఆనాడు హామీ ఇచ్చారు. జగన్‌ చెప్పిందే నిజమైతే ఇప్పుడు రాష్ట్రంలో ఇప్పుడు ఒక్క మద్యం దుకాణం కూడా కనిపించకూడదు. కానీ ఆ పరిస్థితి ఉందా? జగన్‌ మాటమీద నిలబడే వ్యక్తి కాదు కదా. ఇప్పుడు మందు దొరకని ఊరు లేదు. కొన్ని గ్రామాల్లో రెండు, మూడు బెల్ట్‌షాపులు నడుస్తున్నాయి. వైసీపీ నాయకులు, కార్యకర్తలు, సానుభూతిపరులే బెల్టుషాపులు నడిపిస్తున్నారు. వీటిలో క్వార్టర్‌ మద్యం సీసాపై ఎమ్మార్పీ కంటే అదనంగా 40 నుంచి 50 రూపాయల వరకూ వసూలు చేస్తున్నారు. ఇలా ఏడాదికి కనీసం వేల 3 వేల కోట్లు చొప్పున ఐదేళ్లలో 15 వేల కోట్ల రూపాయల వరకూ దోచేశారు. ఇక బార్లైతే బార్లా తెరిపించారు తూగేదాకా తాగించారు.

గతంలో బార్లు లేనిపురపాలికలు, నగరపంచాయతీల్లోనూ కొత్తగా ఏర్పాటు చేయించారు. ప్రధాన నగరాలు, పట్టణాల్లో మద్యం వాక్‌-ఇన్‌ స్టోర్లు తెరిచారు. పర్యాటక కేంద్రాల్లో లిక్కర్‌ అవుట్‌లెట్లు ప్రారంభించారు. మద్యంపై ఆదాయం అంటే ప్రజల రక్తమాంసాలతో వ్యాపారం చేయడమేనని ప్రతిపక్షంలో ఉండగా సుద్దులు చెప్పారు జగన్‌. అధికారంలోకొచ్చాక అదే మద్యం ఆదాయాన్ని ఫుల్లుగా పెంచుకున్నారు. 2014 నుంచి 2019 మార్చి మాసాంతం వరకూ తెలుగుదేశం అధికారంలో ఉన్న ఐదేళ్లలో 75 వేల 285 కోట్ల రూపాయల విలువైన మద్యం విక్రయాలు జరిగాయి. అదే వైసీపీ ఐదేళ్ల ఏలుబడిలో అమ్మింది అక్షరాలా లక్షా 24 వేల 333కోట్లు. అంటే, గత ప్రభుత్వంతో పోల్చితే వైసీపీ హయాంలో 49 వేల 47 కోట్ల రూపాయల విలువైన మద్యాన్ని అదనంగా అమ్మారు.

వైసీపీ నేతలు బెల్ట్‌షాపులు, బార్లలో అదనపు ధరలకు విక్రయించి అనధికారికంగా వసూలు చేసింది 30 వేల కోట్ల వరకూ ఉండొచ్చని అంచనా. ఈ లెక్కన జగన్‌ ఐదేళ్లలో లక్షా 54 వేల 333 కోట్ల రూపాయల్ని మందుబాబుల నుంచి పిండుకున్నారు. తెలుగుదేశం ప్రభుత్వ హయాంతో 65.14 శాతం ఎక్కువగా మద్యం విక్రయించారు. జగన్‌ దృష్టిలో ఇది దశల వారీ మద్య నిషేధమైతే జనం దృష్టిలో తాగుడు బలహీనతను సొమ్ముచేసుకుని గల్లా పెట్టే నింపుకోవడమే.

అసలు జగన్‌ పాలనా రథచక్రాలు నడిచిందే మద్యం ఆదాయం మీద. ఆయన గద్దెనెక్కిన మొదటి ఏడాది అంటే 2019-20 ఆర్థిక సంవత్సరంలో 20 వేల 928 కోట్ల విలువైన మద్యం విక్రయాలు జరిగాయి. అదే 2023-24 ఆర్థిక సంవత్సరానికి అమ్మకాలు 30 వేల 78 కోట్ల రూపాయలకు పెరిగాయి. ఈ లెక్కన ఐదేళ్ల వ్యవధిలో ఎన్ని లక్షల మందికి పూటుగా తాగించారో. ఎన్ని వేల కుటుంబాలను వీధిపాలుజేశారో. ఎంతమంది అక్కచెల్లెమ్మల తాళిబొట్లు తెంచారో ఎంతమందిని అనారోగ్యానికి గురిచేశారో తలుచుకుంటేనే బుర్ర గిర్రున తిరుగుతుంది.