IIT Expert Team Review on Amaravati Situation : రాజధాని అమరావతిలో వైఎస్సార్సీపీ ప్రభుత్వం చేసిన విధ్వంసం వల్ల ఇప్పుడు కొత్తగా చేపట్టాల్సిన నిర్మాణాల మాట అటుంచి, నిలిచిపోయిన వాటిని ముందుకు తీసుకెళ్లేందుకే భారీ కసరత్తు చేయాల్సి వస్తోంది. దానికి ఖర్చూ తడిసి మోపెడవుతోంది. గత ఐదేళ్లుగా చెరువుల్ని తలపిస్తున్న సచివాలయం, విభాగ అధిపతుల కార్యాలయ భవనాల టవర్లు, హైకోర్టు పునాదుల నుంచి నీటిని తోడేందుకే కోటి రూపాయలకు పైగా ఖర్చవుతుందని అంచనా!
ఐఐటీ నిపుణుల బృందం పర్యటన : అమరావతిలో నిలిచిపోయిన నిర్మాణాల నాణ్యతను, ఇతర సాంకేతిక అంశాలను పరిశీలించే బాధ్యతను హైదరాబాద్, మద్రాస్‌ ఐఐటీల నిపుణులకు సీఆర్డీఏ (CRDA) అప్పగించింది. హైదరాబాద్ ఐఐటీ బృందం ఆగస్టు 2న రాజధాని ప్రాంతంలో పర్యటిస్తోంది. మరో వారం పది రోజుల్లో మద్రాస్‌ ఐఐటీ బృందం కూడా అమరావతికి రానున్నట్టు సమాచారం.
అమరావతిలో మరో రెండు రాచబాటలు - సీఆర్డీఏ తాజా ప్రతిపాదన - Amaravathi National Highways
ఐకానిక్‌ భవనాలుగా తలపెట్టిన సచివాలయం, హెచ్ఓడీ టవర్లు, హైకోర్టు పునాదుల పరిశీలన బాధ్యతను మద్రాస్‌ ఐఐటీకి అప్పగించారు. ఎమ్మెల్యేలు, ఎమ్మెల్సీలు, అఖిల భారత సర్వీసుల అధికారుల నివాస భవనాల టవర్ల నిర్మాణాల నాణ్యత పరిశీలన బాధ్యతను హైదరాబాద్ ఐఐటీకి కట్టబెట్టారు. ఇన్నాళ్లూ పట్టించుకోకుండా వదిలేసిన భవనాల పటిష్ఠత ఎలా ఉంది? ఐదేళ్లుగా ఎండకు ఎండుతూ, వానకు తడుస్తున్న ఇనుప ఊచలు తుప్పుపట్టాయా? నిర్మాణాల్ని కొనసాగించాలంటే ఎలాంటి జాగ్రత్తలు తీసుకోవాలనే అంశాల్ని హైదరాబాద్ ఐఐటీ నిపుణులు బృందం (IIT HYD Expert Team) పరిశీలిస్తారు. ఆయా భవన నిర్మాణాల కోసం తీసుకొచ్చిన, ఐదేళ్లుగా స్టాక్‌యార్డుల్లో మూలుగుతున్న నిర్మాణ సామగ్రి పనికొస్తుందా లేదా అన్నదీ ఐఐటీ నిపుణులు ధ్రువీకరించనుంది.
పునాదులు పరిశీలించాలన్నా నీళ్లు తోడాల్సిందే : మద్రాస్‌ ఐఐటీకి చెందిన కాంక్రీట్‌ రంగ నిపుణులు మనుసంతానం, సివిల్‌ ఇంజినీరింగ్‌ విభాగ అధిపతి మెహర్‌ ప్రసాద్, ఇనుముకు తుప్పు (కొరోజన్‌) నిపుణుడు పిళ్లైలతో కూడిన బృందం గతంలో రాజధానిలో సచివాలయం, హెచ్ఓడీ టవర్లు, హైకోర్టు భవనం పునాదులు వేసినప్పుడు సాంకేతిక సహకారం అందించింది. ఐదేళ్లుగా నీళ్లలోనే ఉన్న ఆ పునాదులు, ఉక్కు నాణ్యతను పరిశీలించి అవసరమైన సూచనలు చేసే బాధ్యతను ఇప్పుడు వారికే సీఆర్డీఏ (Capital Region Development Authority) అప్పగించింది.
నీటిని తోడేయాలి : నిపుణుల బృందం రాజధాని పునాదుల్ని పరిశీలించాలంటే ముందు వాటిలో నీటిని తోడేయాలి. రాష్ట్ర సచివాలయం టవర్ల పునాదుల కోసం 1000 మీటర్ల పొడవు, 150 మీటర్ల వెడల్పు, 10 మీటర్ల లోతున భారీ గోతులు తవ్వి, వాటిలో 4 మీటర్ల మందంతో కాంక్రీట్‌ వేసి పునాదులు నిర్మించారు. హైకోర్టు భవనం పునాదుల కోసం 200 మీటర్ల పొడవు, 200 మీటర్ల వెడల్పు, 8 మీటర్ల లోతున భారీ గొయ్యి తవ్వి నిర్మాణ పనులు చేపట్టారు.
ఈ పునాదుల గోతుల్లో కొన్ని లక్షల క్యూబిక్‌ మీటర్ల నీరు నిల్వ ఉందని నిపుణులు అంచనా వేస్తున్నారు. ఆ నీటిని తోడి, ఎప్పటికప్పుడు ఊరే నీటినీ ఎత్తిపోయాలని, పునాదుల్లోకి అంచుల నుంచి విరిగిపడిన మట్టిని, బురదను తొలగించడం కొంత శ్రమతో కూడిన వ్యవహారమని సీఆర్డీఏ ఇంజినీరింగ్‌ నిపుణులు (CRDA Engineering Specialists) చెబుతున్నారు. మళ్లీ నిర్మాణాలు మొదలుపెట్టాలన్నా పునాదుల్లోని నీరంతా తొలగించి మూడు నెలలు పొడిగా ఉంచాలని వారు సూచనలు చేస్తున్నారు.
రాజధాని ప్రాంతంలో వేగంగా జంగిల్‌ క్లియరెన్స్ పనులు - ముళ్లకంపలు, చెట్ల తొలగింపు - Amaravati works
సచివాలయం, హెచ్ఓడీ టవర్లలో సీఎం కార్యాలయం ఉండే టవర్‌ 50 అంతస్తులతో, మిగతా నాలుగు టవర్లను 40 అంతస్తులుగా నిర్మించాలని అధికారుల ప్రణాళిక రూపొందిస్తున్నారు. అంత భారీ నిర్మాణాలు కాబట్టే పునాదుల పటిష్ఠతను నిర్ధారించుకుని, ముందుకు వెళ్లేందుకు ఐఐటీ నిపుణులకు బాధ్యత అప్పగించామని సీఆర్డీఏ అధికారులు భావిస్తున్నారు.
3 నుంచి కంపచెట్ల తొలగింపు : రాజధానిలో అడవిని తలపిస్తున్న కంపచెట్లు తొలగించే ప్రక్రియను ఆగస్టు మూడో తేదీ (Aug 3) నుంచి ప్రారంభించనున్నారు. రాజధాని ప్రాంతంలో వ్యాపించిన ఆ చెట్లు, పిచ్చిమొక్కలు తొలగించేందుకు 36 కోట్ల రూపాయల అంచనా వ్యయంతో సీఆర్డీఏ గుత్తాదారులను టెండర్లు పిలిచింది.
