Clash Between YSRCP and BJP Leaders Dharmavaram : సత్యసాయి జిల్లా ధర్మవరం సబ్ జైలు వద్ద ఉద్రిక్తత చోటు చేసుకుంది. వైఎస్సార్సీపీ, బీజేపీ శ్రేణుల మధ్య వాగ్వాదం నెలకొంది. కమలం పార్టీ నేత హరీశ్ తన అనుచరులతో ఆ రోడ్డు మార్గాన వస్తున్నారు. ఈ క్రమంలోనే మాజీ ఎమ్మెల్యే కేతిరెడ్డి వెంకట్రామిరెడ్డి వర్గీయులు ఆ రహదారిలో వాహనాలను అడ్డుగా పెట్టారు. ఈ నేపథ్యంలోనే వాహనాలు అడ్డు తొలగించాలని కమలం కార్యకర్తలు వారిని కోరారు.
ఈ విషయం కాస్తా ఘర్షణకు దారి తీసింది. ఈ నేపథ్యంలోనే కేతిరెడ్డి వెంట్రామిరెడ్డి డ్రైవర్‌ను హరీశ్ వర్గీయులు చితకబాదారు. కేతిరెడ్డి దురుసుగా వ్యవహరించారని వారు ఆరోపించారు. ఈ క్రమంలోనే బీజేపీ కార్యకర్త ప్రతాపరెడ్డి కేతిరెడ్డి వర్గీయులను అడ్డుకునేందుకు యత్నించారు. ప్రతాపరెడ్డిపై వాహనాన్ని ఎక్కించడంతో ఒక్కసారిగా ఎగిరి కింద పడ్డారు. ధర్మవరం సబ్‌జైలులో ఖైదీ పరామర్శకు కేతిరెడ్డి వచ్చిన సమయంలో ఈ ఘటన చోటు చేసుకుంది. దీంతో ప్రజలు భయాందోళనలకు లోనయ్యారు.
EX MLA Kethireddy VS Harish : ఈ విషయం తెలుసుకున్న కూటమి నాయకులు, కార్యకర్తలు జైలు వద్దకు చేరుకున్నారు. దీనిపై సమాచారం అందుకున్న పోలీసులు ఘటనాస్థలానికి చేరుకొని వారి మధ్య రాజీ కుదిర్చేందుకు ప్రయత్నిస్తున్నారు. అక్కడి నుంచి వారంతా ధర్మవరం పోలీస్ స్టేషన్ వద్దకు చేరుకున్నారు . ఇరువర్గాల ఘర్షణతో పోలీసులు అప్రమత్తమయ్యారు. ఈ క్రమంలోనే పుట్టపర్తి నుంచి అదనపు బలగాలు ధర్మవరానికి రప్పించి పరిస్థితిని సమీక్షిస్తున్నారు.
కేతిరెడ్డి వెంకట్రామిరెడ్డిని జిల్లా నుంచి బహిష్కరించాలి : మరోవైపు ధర్మవరం మాజీ ఎమ్మెల్యే కేతిరెడ్డి వెంకట్రామిరెడ్డిని జిల్లా నుంచి బహిష్కరించాలని కూటమి నేతలు పేర్కొన్నారు. ఆయన రౌడీలను వెంటేసుకుని శాంతిభద్రతలకు విఘాతం కలిగిస్తున్నారని ఆరోపించారు. ధర్మవరంలో అరాచకాలు చేసిన కేతిరెడ్డిని ప్రజలు ఓడించారని చెప్పారు. ఆ ఓటమి జీర్ణించుకోలేక గుండాలను వెంట బెట్టుకొని దాడులకు తెగబడుతున్నారని విమర్శించారు. ఇవాళ జరిగిన ఘటనపై పోలీసులు దర్యాప్తు జరిపి కేతిరెడ్డిని కఠినంగా శిక్షించాలన్నారు.
