ఆర్​జీవీకి హైకోర్టులో చుక్కెదురు - అరెస్టుపై ఆందోళన

విచారణకు సమయం పొడిగింపు కోసం పోలీసులు ముందు అభ్యర్థన చేసుకోవాలి - అరెస్టుపై ఆందోళన ఉంటే బెయిల్ పిటిషన్ వేసుకోవాలన్న న్యాయస్థానం

RGV Case Trial in High Court : అరెస్ట్ నుంచి రక్షణ కల్పించాలంటే బెయిల్ పిటిషన్ దాఖలు చేసుకోవాలని సినీ డైరక్టర్ రాం గోపాల్ వర్మకు హైకోర్టు స్పష్టం చేసింది. అరెస్ట్ నుంచి రక్షణ కల్పించాలని వర్మ తరపు న్యాయవాది చేసిన అభ్యర్థనను న్యాయస్థానం తోసిపుచ్చింది. తనపై ప్రకాశం జిల్లా మద్దిపాడు పోలీసులు నమోదు చేసిన కేసును కొట్టేయాలని సినీ దర్శకుడు రాంగోపాల్ వర్మ హైకోర్టులో దాఖలు చేసిన పిటిషన్​పై విచారణ జరిపింది. విచారణ సందర్భంగా న్యాయస్థానం కీలక వ్యాఖ్యలు చేసింది.

పిటిషనర్​ను అరెస్ట్ చేసే అవకాశం ఉందని, అరెస్ట్ నుంచి రక్షణ కల్పించాలని వర్మ తరపు న్యాయవాది వాదనలు వినిపించారు. అరెస్ట్ విషయంలో ఆందోళన ఉంటే బెయిల్ పిటిషన్ దాఖలు చేసుకోవాలని న్యాయస్థానం స్పష్టం చేసింది. మంగళవారం విచారణ హాజరు కావాలని పోలీసులు నోటీసులు ఇచ్చారని, హాజరు అయ్యేందుకు మరి కొంత సమయాన్ని ఇచ్చేలా పోలీసులను ఆదేశించాలని వర్మ తరపు న్యాయవాది కోర్టను కోరారు. విచారణకు హాజరుకావాలనే విషయంలో సమయం పొడిగింపు కోసం పోలీసులు ముందు అభ్యర్థన చేసుకోవాలని, కోర్టు ముందు కాదని న్యాయస్థానం స్పష్టం తెలిపింది.

సార్వత్రిక ఎన్నికలకు ముందు వ్యూహం సినిమా ప్రమోషన్ సమయంలో అప్పటి ప్రతిపక్ష నేత చంద్రబాబు, జనసేన అధినేత పవన్ కల్యాణ్ వ్యక్తిత్వాలను కించపరిచేలా X లో రాంగోపాల్ వర్మ పోస్టులు పెట్టారు. దీనిపై టీడీపీ మద్దిపాడు మండల ప్రధాన కార్యదర్శి ముత్తనపల్లి రామలింగం పోలీసులకు ఫిర్యాదు చేయగా పోలీసులు కేసు నమోదు చేశారు.

సినీ దర్శకుడు రామ్‌గోపాల్ వర్మపై ప్రకాశం జిల్లాలోని మద్దిపాడు పోలీసు స్టేషన్‌లో ఐటీ చట్టం కింద కేసు నమోదు అయ్యింది. వ్యూహం సినిమా ప్రమోషన్ల సమయంలో నారా చంద్రబాబు నాయుడు, నారా లోకేశ్‌, బ్రాహ్మణి వ్యక్తిత్వాన్ని కించపరిచేలా పోస్టు చేశారని ఆయనపై ఫిర్యాదు చేశారు. తెలుగుదేశం పార్టీ మద్దిపాడు మండల ప్రధాన కార్యదర్శి రామలింగం రామ్‌గోపాల్ వర్మపై ఫిర్యాదు చేశారు. ఈ మేరకు పోలీసులు కేసు నమోదు చేసి దర్యాప్తు చేస్తున్నారు.

గుంటూరు జిల్లా తుళ్లూరు పోలీసులు రామ్‌గోపాల్ వర్మపై కేసు నమోదు చేశారు. చంద్రబాబు నాయుడు, పవన్ కల్యాణ్, నారా లోకేశ్​లపై అసభ్యకర పోస్టులు పెట్టారని తెలుగుదేశం పార్టీ రైతు విభాగం ఉపాధ్యక్షులు నూతలపాటి రామారావు పోలీసులకు ఫిర్యాదు చేశారు. వర్మ పై చర్యలు తీసుకోవాలని పోలీసులను కోరారు. దీంతో తుళ్లూరు పోలీసుల వర్మపై కేసు నమోదు చేశారు.