'చిక్కడు దొరకడు' - పోలీసులతో ఆర్జీవీ దోబూచులాట

పోలీసు దర్యాప్తు బృందాలకు చిక్కని రామ్‌గోపాల్‌ వర్మ - ఏకంగా బుల్లితెరపై ప్రత్యక్షమై ఇంటర్వ్యూలు - సీరియస్‌గా దృష్టి సారించిన పోలీసులు

Police Taken Film Director Ram Gopal Varma Case Seriously : సంచలన సినీ దర్శకుడు రామ్‌గోపాల్‌ వర్మ వ్యవహారం ప్రస్తుతం చర్చనీయాంశంగా మారింది. పోలీసు దర్యాప్తు బృందాలకు చిక్కని వర్మ ఏకంగా బుల్లితెరపై ప్రత్యక్షమై ఇంటర్వ్యూలు ఇవ్వడం హాట్‌ టాపిక్‌గా మారింది. వైఎస్సార్సీపీ హయాంలో 'వ్యూహం' సినిమా ప్రమోషన్‌ సమయంలో అప్పటి ప్రతిపక్ష నేత, ప్రస్తుత సీఎం చంద్రబాబు, జనసేన అధ్యక్షుడు పవన్‌కల్యాణ్, నారా లోకేశ్‌లపై సామాజిక మాధ్యమ వేదికగా అసభ్యకర పోస్టులు పెట్టారు. దీంతో ప్రకాశం జిల్లా మద్దిపాడు స్టేషన్‌లో ఈ నెల 11న వర్మపై కేసు నమోదైంది. అప్పటి నుంచి ఆయన పోలీసులతో దోబూచులాడుతున్నారు. విచారణకు సహకరిస్తానంటూనే పోలీసులతో జిత్తులు ప్రదర్శిస్తున్నారు. దీంతో వర్మ కేసు విచారణను పోలీసులు ప్రతిష్ఠాత్మకంగా తీసుకున్నారు.

సినిమా షూటింగ్‌లో బిజీగా : అసభ్యకర పోస్టుల విషయంలో విచారణకు హాజరవ్వాలని ఏకంగా వర్మ ఉంటున్న హైదరాబాద్‌లోని తన కార్యాలయానికి వెళ్లి మరీ ఏపీ పోలీసులు నోటీసులు ఇచ్చారు. అప్పుడు చిరునవ్వులు చిందిస్తూ వర్మ వాటిని అందుకున్నారు. అనంతరం ఈనెల 19న తేదీన ఒంగోలు రూరల్‌ సీఐ, దర్యాప్తు అధికారి ఎన్‌.శ్రీకాంత్‌బాబు ఎదుట హాజరు కావాల్సి ఉన్నా వర్మ డుమ్మకొట్టారు. ముందుగా నిర్ణయించుకున్న సినిమా షూటింగ్‌లో బిజీగా ఉన్నానని, ఇప్పుడు వస్తే తన నిర్మాతకు నష్టం కలుతుందని, అందుకే వారం రోజులు గడువు ఇవ్వాలని విచారణ రోజున వాట్సప్‌ ద్వారా దర్యాప్తు అధికారిని కోరారు.

వర్మ నివాసానికి వెళ్లిన పోలీసులు : తరువాత అదే రోజు 11 గంటల సమయంలో తన తరఫు న్యాయవాది శ్రీనివాసరావు ద్వారా ఓ లేఖ ఇప్పించారు. అప్పటికి పోలీసులు రామ్​గోపాల్ వర్మ అభ్యర్థనను మన్నించారు. అనంతరం 25న తేదీన హాజరుకావాలని మరోసారి నోటీసులు పంపారు. దీంతో విచారణకు సహకరిస్తానని, న్యాయవాది ద్వారా నోటీసులు పంపిన వర్మ ఆ తర్వాత హైకోర్టులో బెయిల్‌ పిటిషన్‌ వేశారు. అనంతరం సెల్‌ఫోన్‌ స్వీచ్ ఆఫ్‌ చేసి అజ్ఞాతంలోకి వెళ్లారు. రెండు సార్లు పిలిచిన విచారణకు హాజరుకాకపోవడంతో పోలీసులు నేరుగా హైదరాబాద్‌లోని వర్మ నివాసానికి వెళ్లారు. అక్కడ ఆయన లేకపోవడంతో పోలీసులు గాలింపు చేపట్టారు.

వర్మ మూడు ఫోన్లు ఆఫ్ : ఒంగోలు పోలీసుల ఎదుట విచారణకు హాజరయ్యేందుకు రెండు వారాల గడువు కావాలని హైదరాబాద్​కు వెళ్లిన ప్రకాశం జిల్లా పోలీసులను వర్మ న్యాయవాదులు కోరారు. ప్రస్తుతం సినిమా షూటింగ్‌లో బిజీగా ఉన్న వర్మ అవసరమైతే వర్చువల్‌ విధానంలో విచారించవచ్చని వివరించారు. అప్పటికే రామ్​గోపాల్ వర్మ సెల్‌ఫోన్‌లు స్విచ్‌ ఆఫ్‌ చేయడం, తన సిబ్బంది పొంతనలేని సమాధానాలు చెప్పాడంతో హైదరాబాద్‌లోని కార్యాలయంతో పాటు ఫిల్మ్‌నగర్‌ శివారులో ఉన్న వర్మ రిసార్ట్స్, ఫామ్‌హౌస్‌లో పోలీసులు గాలింపు చేపట్టారు. ఈ క్రమంలో తాను కోయంబత్తూరులో ఉన్నానని ఎక్స్‌ వేదికగా పోస్టు పెట్టారు. దీంతో ప్రకాశం జిల్లా పోలీసులు అక్కడకూ వెళ్లారు. అప్పటికే తన వద్ద ఉన్న మూడు ఫోన్లను వర్మ స్వీచ్ ఆఫ్ చేశారు. వాటిని వేర్వేరు ప్రాంతాల్లో వదిలేసి తన అనుచరులతో సామాజిక మాధ్యమాల్లో వివిధ పోస్టులు పెట్టించారు. ఏపీ పోలీసులకు పలు ప్రశ్నలు సంధించారు. ప్రస్తుతం ఈ వ్యవహారం చర్చకు దారి తీసింది.

టీవీ ఛానళ్లకు ఇంటర్వ్యూలు : ఓ వైపు పోలీసులు వర్మ కోసం తీవ్రంగా గాలిస్తుంటే హఠాత్తుగా బుల్లితెరపై దర్శనమిచ్చారు. పోలీసు చర్యలను ప్రశ్నిస్తూ, విచారణ ఏ విధంగా జరగాలి, కేసులు ఎలా నమోదు చేయాలి, చట్టాలు ఏమైనా వారి చుట్టాలా అనే ప్రశ్నిస్తూ వేస్తూ పలు టీవీ ఛానళ్లకు ఇంటర్వ్యూలు ఇచ్చారు. గత నాలుగైదు రోజులుగా దర్యాప్తు పోలీసులకు దొరకని వర్మ ఆయా మీడియా సంస్థలకు మాత్రం ఎలా అందుబాటులోకి వచ్చారన్నది చర్చనీయాంశంగా మారింది. ఈ పరిస్థితి దర్యాప్తు బృందాలకూ మింగుడు పడని అంశంలా మారింది. గంటల తరబడి టీవీ ఛానళ్ల స్టూడియోలోంచి మాట్లాడిన వర్మ పోలీసులకు చిక్కకపోవటం ఏంటన్న చర్చ రెండు తెలుగు రాష్ట్రాల్లో నడుస్తోంది. దీంతో వర్మ కేసు వ్యవహారంపై ప్రకాశం జిల్లా పోలీసులు మరింత దృష్టి పెట్టారు. వర్మ బెయిల్‌ పిటీషన్‌ను న్యాయస్థానం డిసెంబర్‌ 2 నాటికి వాయిదా వేసింది. అప్పటిలోగా రామ్​గోపాల్ వర్మను కస్టడీలోకి తీసుకొని విచారించాలని పోలీసులు పట్టుదలగా ఉన్నారు.